झापा बिर्तामोडमा करेन्ट लाग्दा प्राविधिकको मृत्यु

झापाको बिर्तामोड नगरपालिका–२ स्थित पश्चिम स्टेण्डमा ट्रान्समिटर जडान गर्ने क्रममा करेन्ट लागेर एक जना विद्युत प्राविधिकको मृत्यु भएको छ।

मृतक ३५ वर्षीय दिपक पाण्डे अर्जुनधारा नगरपालिका–४, भाङबारीका बासिन्दा हुन्। उनी बिर्तामोड नगरपालिका अन्तर्गतको विद्युत कार्यालयमा कार्यरत थिए र फिल्डको कामका लागि सो स्थानमा खटिएका थिए।

मिति २०८२ साल साउन २ गते दिउँसो करिब २ बजेर २० मिनेट जाँदा ट्रान्समिटर जडानका क्रममा अचानक करेन्ट लागेर गम्भीर घाइते भएका पाण्डेलाई सहकर्मीहरूले तत्काल बीएण्डसी अस्पताल बिर्तामोडमा ल्याएका थिए।
तर उपचारका क्रममा चिकित्सकले अपराह्न ३ बजे उनलाई मृत घोषणा गरेका हुन्।

घटनाको खबर पाउनेबित्तिकै इलाका प्रहरी कार्यालय अनारमनीबाट प्रहरी टोली खटिएको थियो। हाल घटनाको अनुसन्धान र आवश्यक कानुनी प्रक्रिया अगाडि बढाइएको प्रहरीले जनाएको छ।