झापा । गुल्मीको गुल्मी दरबार गाउँपालिका- ५ मा जङ्गलकाे डढेलाे बस्तीमा पस्दा ३ वटा घर र ३ वटा गोठ जलेर नष्ट भएका छन् भने एउटा मोटरसाइकल जलेर नष्ट भएको प्रहरीले जनाएको छ ।
गुल्मी दरबार गाउँपालिका–५, डाँडापोखरीस्थित खरबारी र जंगलमा लागेको आगोले रविन ढकालको तीन तले घर, दुई तले गोठ र रिता ढकालको एक तले गोठ आगलागीबाट जलेर नष्ट भएको प्रहरीले जनाएको छ ।
गुल्मी दरबार गाउँपालिका–७ ढुंगे देउरालीका स्थानीयको खरबारी र जंगलमा लागेको डढेलाे बस्तीमा सल्किँदा पुतली कार्कीको घरलाई पनि आंशिक क्षति पुर्याएको छ । प्रहरीका अनुसार कार्कीको घरको एउटा कोठामा क्षति पुगेको छ भने एउटा बाख्रा खोर जलेर पूर्ण रुपमा नष्ट भएको छ ।
त्यस्तै, नरेन्द्र शर्मा ज्ञवालीको घरमा आंशिक क्षति पुगेको छ भने लु ४५ प ३६३ नम्बरको मोटरसाइकल पनि जलेर पूर्ण रुपमा नष्ट भएको जानकारी आएकाे छ ।
बजारमारे हर्रा रुखका सुवास खत्रीको गोठ र गोठमा रहेको एउटा भैंसी, ३ वटा बाख्रा जलेर नष्ट भएको प्रहरीले जनाएको छ । सोही ठाउँकै लुरीकुमारी बस्नेतको गोठसँगै एउटा भैंसी पनि जलेको छ ।
प्रहरीका अनुसार लक्ष्मी बस्नेतको २ तले खाली गोठ पनि जलेर पूर्ण रुपमा नष्ट भएको छ । अहिले बस्तीमा लागेको आगो नियन्त्रणमा आए पनि जंगलमा लागेको आगो नियन्त्रणमा आउन नसकेको प्रहरीले जनएको छ ।
