झापा / नेपाली चिया उद्योग र निर्यातमा देखिएको गम्भीर संकटप्रति नेपाली कांग्रेसका सचेतक निश्कल राई तथा राष्ट्रिय सभा सदस्य जयन्तीदेवी राईले गम्भीर चिन्ता व्यक्त गर्दै सरकारको ध्यानाकर्षण गराएका छन्।
पूर्वी झापा लगायत पहाडी जिल्ला इलाम र पाँचथरको आर्थिक मेरुदण्डका रूपमा रहेको चिया क्षेत्र सरकारी उदासीनता र फितलो कूटनीतिक पहलका कारण धराशायी बन्ने अवस्थामा पुगेको संसद् र सञ्चारकर्मीमाझ सांसदहरूले आरोप लगाएका छन्।
प्रमुख बजारका रूपमा रहेको छिमेकी राष्ट्र भारतको पश्चिम बंगाल सरकार र भारतीय चिया बोर्डले नयाँ मापदण्ड एसओपी लागू गरी गुणस्तर परीक्षणका नाममा नेपाली चिया बोकेका कन्टेनरहरूलाई पानीट्याङ्की नाकामा १५ दिनभन्दा बढी रोकिदिँदा १२ लाख किलोभन्दा बढी तयारी चिया गोदाममै थन्किएको छ। यस सुनियोजित अवरोधका कारण नेपालका ८३ भन्दा बढी चिया उद्योगहरू बन्द हुने अवस्थामा पुगेको र भण्डारण क्षमता सकिएकाले किसानलाई भुक्तानी दिन नसक्दा सिंगो कृषि क्षेत्र नै आतंकित बनेको छ।
