झापा / खाेटाङ र उदयपुर जाेड्न सुनकाशीस्थित बंशिलाघाटमा बेलिब्रिज जनाड भएकाे छ ।
खोटाङको बराहपोखरी गाउँपालिका-५ पौवासेरा र उदयपुरको चौदण्डीगढी नगरपालिका-१ चौदण्डीगढीको सिमानामा पर्ने सुनकोसीको बंशिलाघाटमा बेलिब्रिज राखिएको हो ।
बंशिलाघाटमा पक्की पुल निर्माणको काममा चरम ढिलासुस्ती भइरहेको अवस्थामा कोशी प्रदेश भौतिक पूर्वाधार विकास मन्त्रालयले ५१.८१ मिटर लामो र ४.१ मिटर चौंडाई भएको बेलिब्रिज जडान गरेको हो । नदीमा पानीको बहाव बढ्न थालेपछि निकालेर राख्ने गरी जडान गरिएको अस्थायी बेलिबिज माघ २४ गतेदेखि सञ्चालनमा ल्याइएको छ ।
३ वर्ष ८ महिनाभित्र बनाइसक्नुपर्ने गरी कालिका–बेदान्सी जेवीले ०७७ पुस २८ गते ठेक्का सम्झौता गरिसकेकाे थियाे। १ सय ५० मिटर लम्बाई र ११ मिटर चौडाईको ३ स्पानको पुल बनाउन मूल्य अभिवृद्धि कर (भ्याट) सहित १९ करोड १८ लाख ४१ हजार ४ सय २० रुपैयाँमा ठेक्का सम्झौता भएता पनि हालसम्म याे पुल निर्माण सम्पन्न भइसकेकाे छैन ।
