झापा / कतारको राजधानी दोहाबाट करिब ८० किलोमिटर उत्तरमा रहेको प्रमुख एलएनजी (तरलीकृत प्राकृतिक ग्यास) उत्पादन केन्द्र रासलाफान औद्योगिक सहरको बरजान ग्यास प्रशोधन केन्द्रमा आइतबार राति भयानक विस्फोट भएको छ।
कतारको गृह मन्त्रालय र सरकारी स्वामित्वको कम्पनी कतार इनर्जीका अनुसार, बन्द रहेको प्लान्ट पुनः सञ्चालन गर्ने क्रममा "प्राविधिक गडबडी" का कारण आन्तरिक विस्फोट र आगलागी भएको हो।
विस्फोटको आवाज यति शक्तिशाली थियो कि त्यसको धक्का राजधानी दोहासम्म महसुस गरिएको प्रत्यक्षदर्शीहरूले बताएका छन्।
विस्फोट भएको रासलाफान औद्योगिक क्षेत्र कतारमा नेपाली, भारतीय र बङ्गलादेशी मजदुरहरू ठूलो संख्यामा कार्यरत रहेको क्षेत्र हो। विशेषगरी यो प्लान्टमा नेपाली श्रमिकहरू स्काफोल्डिङ र प्राविधिक काममा संलग्न रहने गरेका छन्। दुर्घटनामा घाइते र बेपत्ता हुनेहरूमा नेपाली श्रमिकहरू पनि परेको प्रारम्भिक जानकारी प्राप्त भए तापनि उनीहरूको नाम र विस्तृत विवरण कतारी अधिकारीहरू तथा दोहास्थित नेपाली दूतावासले आधिकारिक रूपमा सार्वजनिक गर्न बाँकी छ।
कतारको गृह मन्त्रालयले जारी गरेको आधिकारिक विज्ञप्तिअनुसार हालसम्म ५४ जना घाइते भएको पुष्टि भएको छ भने १८ जना अझै बेपत्ता छन्। कतार अन्तर्राष्ट्रिय खोज तथा उद्धार समूह (लख्विया) र नागरिक सुरक्षा (सिभिल डिफेन्स) टोलीहरूले रातिदेखि नै बेपत्ताहरूको खोजी कार्य तीव्र पारेका छन्।
प्रशासनले आपत्कालीन टोली परिचालन गरी आगो पूर्ण रूपमा नियन्त्रणमा लिइसकेको र वायुमण्डलमा सर्वसाधारणको स्वास्थ्यलाई असर गर्ने खालको कुनै हानिकारक ग्यास चुहावट नभएको स्पष्ट पारेको छ। हाल घाइतेहरूको स्थानीय अस्पतालहरूमा उपचार भइरहेको छ र बेपत्ताहरूको खोजी कार्य जारी छ।
