मुटु राेगीहरु दिनप्रतिदिन बढ्दै, डाक्टरको अनिकाल

झापा / नेपालका गाउँ-बस्तीमा अचेल एउटा निसासिँदो त्रास फैलिरहेको छ। मानिसहरू हाँस्दाहाँस्दै ढलिरहेका छन्, तन्नेरी उमेरमै हृदयघातको सिकार भइरहेका छन्। हिजोआज मुटु रोग कसैको व्यक्तिगत स्वास्थ्यको समस्या मात्र रहेन, बरु यसले देशैभरि एउटा भयानक महामारीको रूप लिँदै गइरहेको छ। तर, विडम्बना कस्तो छ भने, एकातिर रोगले मुटुहरू तीव्र गतिमा अस्वस्थ बन्दै गइरहेका छन् भने अर्कोतिर ती मुटुको धड्कन जोगाउने विशेषज्ञ चिकित्सकको मुलुकमा चरम अभाव छ। यो अभावले अस्पतालका गल्लीहरूमा हरेक दिन कयौँ निरिह आँखाहरू आँसुमा डुबिरहेका छन्।