झापा । अर्जुनधारा नगरपालिकाले आगामी आर्थिक वर्ष २०८३-०८४ का लागि ८९ करोड ८५ लाख २५ हजार रुपैयाँको वार्षिक बजेट, नीति तथा कार्यक्रम सार्वजनिक गरेको छ ।
नगरपालिकाको १९ औँ नियमित अधिवेशनमा बुधबार उपप्रमुख खड्गमाया पराजुलीले बजेट प्रस्तुत गरेकी थिइन् ।
पूर्वाधार विकासतर्फ १० करोड ६८ लाख, वडास्तरीय कार्यक्रमका लागि ९ करोड ९० लाख, सामाजिक विकासतर्फ ५ करोड २५ लाख, वन, वातावरण तथा विपद् व्यवस्थापनमा १ करोड ४४ लाख, संस्थागत विकास तथा सुशासनमा १ करोड २९ लाख र आर्थिक विकासतर्फ १ करोड ११ लाख रुपैयाँ छुट्ट्याइएको छ । नगरपालिकाको प्रशासनिक खर्चका लागि १७ करोड ८९ लाख रुपैयाँ विनियोजन गरिएको छ ।
संघीय सरकारको वित्तीय समानीकरण अनुदानबाट १७ करोड २५ लाख, राजस्व बाँडफाँडबाट १४ करोड ४७ लाख र सशर्त अनुदानबाट ३४ करोड ३५ लाख रुपैयाँ प्राप्त हुने अनुमान गरिएको छ । प्रदेश वित्तीय समानीकरणबापत १ करोड ६० लाख २३ हजार र राजस्व बाँडफाँडबापत १ करोड ७३ लाख ७७ हजार रुपैयाँ प्राप्त हुनेछ । नगरपालिकाले आन्तरिक कर तथा राजस्व संकलनबाट ७ करोड ५० लाख, मालपोत रजिष्ट्रेसनबाट ५ करोड र जनसहभागिताबाट २ करोड ५० लाख रुपैयाँ संकलन गर्ने लक्ष्य राखेको छ ।
