२१ वर्षदेखि फरार रहँदै आएका कर्तव्य ज्यान मुद्दाका अभियुक्त शम्सेर बहादुर तामाङलाई संखुवासभा प्रहरीले पक्राउ गरेको छ। जिल्ला प्रहरी कार्यालय संखुवासभाले दिएको जानकारीअनुसार तामाङलाई साउन ५ गते चैनपुर नगरपालिका–९ स्थित घरमै लुकिछिपि बसेको अवस्थामा पक्राउ गरिएको हो ।
६२ वर्षीय तामाङले २०६१ साल चैत २२ गते भोजपुर जिल्ला जरायोटार–४ निवासी ३६ वर्षीय पर्शुराम बि.क.को ज्यान लिएको अभियोगमा दोषी ठहरिएर फरार रहँदै आएका थिए । उनलाई २०६९ साल असार १७ गते धनकुटा पुनरावेदन अदालतले २ वर्ष कैद सजाय तोकेको थियो ।
गाउँघरमै फर्किएर बसिरहेको विशेष सूचनाको आधारमा इलाका प्रहरी कार्यालय चैनपुरबाट खटिएको टोलीले तामाङलाई पक्राउ गरेको हो ।
उनलाई संखुवासभा जिल्ला अदालतमा पेस गरिएको र अदालतको आदेशअनुसार कैद भुक्तानका लागि कारागार कार्यालय खाँदबारी पठाइएको जिल्ला प्रहरी कार्यालयले जनाएको छ ।
