झापाको बिर्तामोड नगरपालिका–१० स्थित पथरभिट्टामा करेन्ट लाग्दा एक व्यक्तिको मृत्यु भएको छ। स्थानीय ५३ वर्षीय पुष्प पोखरेल आफ्नै नयाँ निर्माणाधीन घरमा मोटर जडान गरी पानी हाल्ने क्रममा अचानक करेन्ट लागेर गम्भीर घाइते भएका थिए।
घटना लगत्तै निजकै छिमेकी भवानी घिमिरेले पोखरेललाई राति करिब ८:४० बजे बिएण्डसी अस्पताल बिर्तामोड ल्याएका थिए। तर उपचारको क्रममा चिकित्सकले मृत घोषणा गरेका छन्।
प्राप्त जानकारी अनुसार, मृतक पुष्प पोखरेल घरमा एक्लै बस्दै आएका थिए, भने उनका परिवार सदस्यहरू पाँचथर जिल्लामा बसोबास गर्दै आएका छन्।
हाल शव बिएण्डसी अस्पतालमै राखिएको छ। घटनाको थप अनुसन्धान र कानुनी प्रक्रिया अगाडि बढाउन मिति २०८२।०३।३० गते इलाका प्रहरी कार्यालय अनारमनीबाट प्रहरी अधिकृतको कमाण्डमा टोली खटिएको जनाइएको छ।
