झापा / झापाका विभिन्न स्थानमा प्रहरीले भन्सार छली गरी ल्याइएका सामान तथा अवैध माछा बरामद गरेको छ। बुधबार जिल्लाका तीन फरक स्थानमा गरिएको कारबाहीमा करिब ३ लाख २४ हजार रुपैयाँभन्दा बढी मूल्यका सामग्री नियन्त्रणमा लिइएको जिल्ला प्रहरी कार्यालय झापाले जनाएको छ।
प्रहरी चौकी चारआलीबाट प्र.ना.नि. किरणकुमार राईको कमाण्डमा खटिएको गस्ती टोलीले मेचीनगर–१३ स्थित फुलबासा पुल नजिक बेवारिसे अवस्थामा लुकाइछिपाई राखिएको पानजन्य सामग्री फेला पारेको थियो। प्रहरीले हरियो पानको पत्ता, विभिन्न प्रकारका गुल, रंगोल, पान मसला, दिलखुस चट्नी तथा केशर तमाखु गरी जम्मा ५२ हजार २० रुपैयाँ बराबरका सामग्री नियन्त्रणमा लिई आवश्यक कारबाहीका लागि मेची भन्सार कार्यालय काँकरभिट्टामा बुझाएको छ।
त्यसैगरी, इलाका प्रहरी कार्यालय गौरिगञ्जबाट खटिएको टोलीले गौरिगञ्ज गाउँपालिका–३ बुधबारे हटिया क्षेत्रमा अवैध रूपमा भन्सार छली गरी ल्याइएको २० केजी मुङ्ग्री माछा बरामद गरेको छ। करिब ६ हजार रुपैयाँ मूल्य बराबरको उक्त माछा स्थानीय जनप्रतिनिधि, भद्रभलाद्मी, पशु क्वारेन्टाइन तथा बजार व्यवस्थापन समितिका प्रतिनिधिको रोहबरमा खाल्डो खनी नष्ट गरिएको प्रहरीले जनाएको छ।
यता, इलाका प्रहरी कार्यालय काँकरभिट्टाबाट खटिएको टोलीले मेचीनगर–६ स्थित हनुमान मन्दिर क्षेत्रबाट भारतबाट नेपालतर्फ अवैध रूपमा ल्याइँदै गरेको मोबाइलका विभिन्न सहायक सामग्री तथा बालबालिकाका कपडा बरामद गरेको छ। बरामद सामग्रीमध्ये मोबाइलका सहायक सामग्रीको मूल्य २ लाख ५५ हजार ४२५ रुपैयाँ र कपडाको मूल्य १० हजार ६ सय रुपैयाँ रहेको छ। जम्मा २ लाख ६६ हजार २५ रुपैयाँ बराबरका ती सामग्री नियन्त्रणमा लिई थप अनुसन्धान भइरहेको प्रहरीले जनाएको छ।
