झापा / नेपालसहित विश्वका विभिन्न देशमा शुक्रबार फेसबुक र इन्स्टाग्राम सेवा आंशिक रूपमा अवरुद्ध भएको छ। सामाजिक सञ्जाल प्रयोगकर्ताहरूले फेसबुक फिड रिफ्रेस नहुने, लगइनमा समस्या आउने तथा सामग्री लोड हुन नसकेको गुनासो गरेका छन्।
अन्तर्राष्ट्रिय आउटेज ट्र्याकिङ प्लेटफर्महरूका अनुसार शुक्रबार बिहानदेखि फेसबुक र इन्स्टाग्राममा समस्या देखिएको हो। हजारौं प्रयोगकर्ताले सेवा अवरुद्ध भएको रिपोर्ट गरेका छन्।
फेसबुकको मातृ कम्पनी मेटाले हालसम्म समस्याको विस्तृत कारण सार्वजनिक गरिसकेको छैन। प्राविधिक टोलीले समस्या समाधानका लागि काम गरिरहेको अन्तर्राष्ट्रिय सञ्चारमाध्यमहरूले जनाएका छन्।
नेपालका प्रयोगकर्ताले पनि फेसबुक चलाउन कठिनाइ भएको भन्दै अन्य सामाजिक सञ्जालमार्फत गुनासो व्यक्त गरिरहेका छन्। सेवा पूर्ण रूपमा कहिले सामान्य हुन्छ भन्नेबारे मेटाले औपचारिक जानकारी दिएको छैन।
