झापा / माध्यमिक शिक्षा परीक्षा (एसईई) को नतिजा प्रकाशनमा गम्भीर त्रुटि भएको तथ्य सार्वजनिक भएको छ। राष्ट्रिय परीक्षा बोर्डले पुनर्योग (रिटोटलिङ/पुनः परीक्षण) का लागि आवेदन दिएका विद्यार्थीहरूको नतिजा पुनः जाँच गर्दा ५ प्रतिशतभन्दा बढी विद्यार्थीको प्राप्ताङ्क परिवर्तन भएको पाइएको हो।
राष्ट्रिय परीक्षा बोर्डले सार्वजनिक गरेको नतिजामा चित्त नबुझाएर ३३ हजार ८ सय ५१ विद्यार्थीले पुनर्योगका लागि आवेदन दिएका थिए । शिक्षक र बोर्डको लापरबाहीका कारण ५ प्रतिशतभन्दा बढी विद्यार्थीको नतिजा परिवर्तन भएको पाइएको छ । विद्यार्थीले ५ सय शुल्क बुझाएर पुनर्योगका लागि अनलाइन आवेदन दिएका थिए । नतिजामा सुधार भएका विद्यार्थीमध्ये अधिकांशको उत्तरपुस्तिकामा शिक्षकले प्राप्ताङ जोड्न नै गडबड गरेका पाइएको छ ।
बोर्डका अनुसार नतिजाप्रति असन्तुष्ट भई हजारौँ विद्यार्थीले पुनर्योगका लागि आवेदन दिएका थिए। पुनः परीक्षणको क्रममा सयौँ विद्यार्थीको अंक तथा ग्रेड परिवर्तन भएको भेटिएपछि शिक्षकहरूको मूल्याङ्कन प्रक्रिया र बोर्डको नतिजा व्यवस्थापन प्रणालीमाथि प्रश्न उठेको छ।
यसअघि सार्वजनिक विवरणअनुसार कतिपय विद्यार्थीले प्राप्त गरेको वास्तविक अंक कम्प्युटर प्रणालीमा प्रविष्ट गर्दा त्रुटि भएको पाइएको थियो। केही विद्यार्थीको उच्च अंक कम देखिएको तथा अंक उल्टो प्रविष्ट गरिएका घटनासमेत फेला परेको बोर्डले स्वीकार गरेको थियो।
शिक्षा क्षेत्रका जानकारहरूले यस्तो त्रुटिले विद्यार्थीको भविष्यमा प्रत्यक्ष असर पार्ने भएकाले मूल्याङ्कन र नतिजा प्रकाशन प्रक्रियालाई अझ पारदर्शी र विश्वसनीय बनाउनुपर्ने बताएका छन्। पुनर्योगपछि ठूलो संख्यामा विद्यार्थीको नतिजा परिवर्तन हुनु शिक्षकको लापरबाही, अंक प्रविष्टिमा कमजोरी तथा बोर्डको अनुगमन प्रणाली कमजोर रहेको संकेत भएको उनीहरूको भनाइ छ।
विद्यार्थी र अभिभावकहरूले पनि बोर्डसँग उत्तरपुस्तिका परीक्षण र अंक प्रविष्टि प्रक्रियामा सुधार गर्दै यस्ता त्रुटि दोहोरिन नदिने व्यवस्था गर्न माग गरेका छन्।
