झापा / सुनसरीको हरिनगर र देवानगञ्ज क्षेत्रमा दुई समुदायबीच मध्यरातमा भएको उग्र झडप नियन्त्रणमा लिन सुरक्षाकर्मीले बल प्रयोग गर्दा एक जनाको मृत्यु भएपछि स्थानीय प्रशासनले जिल्लाका ५ प्रमुख बजार क्षेत्रमा अनिश्चितकालीन कर्फ्यु आदेश जारी गरेको छ।
सुनसरीका प्रमुख जिल्ला अधिकारी वासुदेव घिमिरेले स्थानीय प्रशासन ऐन, २०२८ को दफा ६(क) बमोजिम साउन ११ गते सोमबार बिहान ७ बजेदेखि अर्को सूचना जारी नभएसम्मका लागि कर्फ्यु आदेश लागू गरका हुन्। आइतबार राति बोलबमका लागि कोशी ब्यारेजबाट जल लिएर डिजे बजाउँदै देवानगञ्ज गाउँपालिका-३ स्थित कप्तानगञ्ज चोकतर्फ गइरहेका हिन्दु धर्मावलम्बी र अर्को समुदायका युवाहरूबीच डिजेको आवाज र धार्मिक झण्डाको विषयलाई लिएर विवाद सुरु भएको थियो। सामान्य विवादले उग्र रूप लिँदै मध्यरातमा दुई समूहबीच ढुङ्गामुढा, घर, सवारीसाधन र मेडिकल पसलहरू तोडफोड तथा आगजनीसहित हिंसात्मक झडप भएपछि स्थिति नियन्त्रणमा लिन सुरक्षाकर्मीले सुरुमा अश्रुग्यास र हवाई फायर गरेका थिए।
