फायल तस्वीर
झापा । झापा र इलामका वनजङ्गलमा काठको अवैध तस्करी बढेको तथ्याङ्कले पुष्टि गरेको छ । चालु आर्थिक वर्षको दश महिनामा दुई जिल्लाका विभिन्न स्थानबाट छ सय ९१ क्युविक फिट काठ बरामद भएको तथ्याङ्कले देखाएको छ ।
काठ तस्करीमा प्रहरीको सक्रियता केही बढेपछि धमाधम काठ कारोबारी फेला पर्न थालेका छन् । जिल्ला प्रहरी कार्यालय झापाले दिएको तथ्याङ्कअनुसार चालु आर्थिक वर्ष २०८०÷०८१ को दश महिनामा जिल्लाका अलग–अलग स्थानबाट ६ सय ९१ क्युविक फिट काठ बरामद भएको छ । यसबापत ४० लाख ४५ हजार ५ सय रुपैयाँ राजस्व जम्मा भएको कार्यालयले जनाएको छ । त्यसमा प्रयोग भएका ८ वटा सवारी साधन र त्यसमा संलग्न आठ जनालाई प्रहरीले पक्राउ गरेको जिल्लाका प्रहरी प्रवक्ता एवम् डिएसपी कृष्णकुमार चन्दले जानकारी दिए ।
आर्थिक वर्ष ०७८/७९ मा १२ सय ६८ क्युविक फिट काठ बरामद गरेको छ भने १३ वटा सवारी साधनसहित १२ जनालाई पक्राउ गरेको छ । त्यसबापत ४० लाख ५७ हजार पाँच सय ३६ रुपैयाँ राजस्व उठाएको छ । त्यसैगरी आर्थिक वर्ष ०७९/८० मा २४ सय ७२ क्युविक फिट काठ, १७ मानिस र २९ वटा सवारी साधन नियन्त्रणमा लिएको उल्लेख छ । प्रहरीले सो वर्ष ९७ लाख ९४ हजार ८ सय १० रुपैयाँ राजस्व उठाएको उल्लेख छ ।
प्रहरीले बरामद काठ आवश्यक कारबाहीका लागि डिभिजन वन कार्यालय झापामा पठाएको छ । जिल्लामा बेला–बेलामा तस्करी र अवैध ओसार–पसारका घटनाहरू सार्वजनिक हुँदै आएका छन् । इलाम र झापा खुल्ला सिमाना भएको क्षेत्र भएकोले काठ तस्करी हुँदै आएको जनाएको छ ।
राति र बिहानको समयमा काठ तस्करी हुँदै गरेको गोप्य सूचना पाएपछि प्रहरी टोली खटाएर काठ पक्राउ गरिएको कार्यालयको भनाइ छ । इलामका वनजङ्गलबाट अवैधरूपमा काटिने रुख चिरान गरेर वा गोलिया आकारमै काठ झापातिर तस्करी हुने गरेको अनुसन्धानबाट पुष्टि भएको प्रहरीले जनाएको छ ।
झापासँग सिमाना जोडिएको इलामका सीमावर्ती वनक्षेत्रबाट तस्करी गरी ल्याइएको अवैध काठ नेपाल प्रहरी, सशस्त्र प्रहरी र वन कार्यालयका कर्मचारीले बरामद गर्ने गरेका छन् । अवैध काठ चोरी मुद्दामा वन ऐन २०४९ अनुसार कानूनी कारबाही गरिँदै आएको डिभिजन वन कार्यालयले जनाएको छ ।
