झापा । कास्कीको पोखराबाट नेपाल प्रहरीले अटोमेटिक पेस्तोलसहित एकजना डाँकालाई पक्राउ परेको छ । पक्राउ पर्नेमा पोखरा महानगरपालिका–१८ स्थित सराङकोट घर भएका ३८ वर्षीय राजु विक भनिने नरबहादुर विक छन् ।
उनको साथबाट ९–एमएमको अटोमेटिक पेस्तोल १ थान र गोली बरामद गरिएको जिल्ला प्रहरी कार्यालय कास्कीका एसपी मोहन थापाले बताए । पोखरा–२४ स्थित बाँस्कोटमा निर्माणाधीन घरमा लुकाएर राखेको अवस्थामा वडा प्रहरी कार्यालय बैदामको टोलीले पेस्तोल बरामद गरेको हो ।
लागुऔषध, चोरी, डाँका, लुटपाट र अभद्र व्यवहार सहित उनी विरुद्ध प्रहरीले यसअघि १३ वटा मुद्दामा अनुसन्धान गरेको प्रहरीको अपराध तथ्याङ्क रेकर्डमा भेटिएको छ । २०६२ सालदेखि नै उनी अपराधमा संलग्न रहेको एसपी थापाले जानकारी दिए ।
