झापा । करिव चार महिनाअघि सवारी दुर्घटनामा परी घाइते भएका बिर्तामोड ४ का १६ वर्षीय अंशु श्रेष्ठको उपचारका क्रममा निधन भएको छ ।
बिर्तामोडको बीएण्डसी हस्पिटलमा उपचारका क्रममा आइतवार बिहान ७ बजे उनको मृत्यु भएको हो । गत माघ १२ गते अन्दाजी साँझ ५.४५ बजेको समयमा बिर्तामोड ३ दुर्गा पाटी प्यालेस छेउस्थित भित्री पक्की सडकखण्डमा उत्तरबाट दक्षिणतर्फ जाँदै गइरहेको प्र१–०१–००१च ७१५३ न. को कार र बिपरित दिशातर्फ आउँदै गरेको मे ६प १६१२ न. को मोटरसाइकल एक आपसमा ठक्कर खाई दुर्घटना भएको थियो ।
दुर्घटनामा मोटरसाइकल चालक बिर्तामोड ४ बस्ने १८ वर्षीय सचिन खतिवडा र सोही मोटरसाइकलको पछाडि सवार वडा नं ३ बस्ने १९ वर्षीय कलिस लिम्बू सकुशल रहेका थिए भने सोही मोटरसाइकलको पछाडि सवार अंशु श्रेष्ठको खुट्टामा चोट लागेर सामान्य घाइते भएका थिए । उनलाई उपचारको लागि बिर्तासिटी अस्पताल बिर्तामोड पुर्याएर सामान्य उपचारपश्चात् डिस्चार्ज भई घर ल्याइएकोेमा राति समस्या परेपछि थप उपचारको लागि ओमसाई पाथिभरा अस्पताल भद्रपुर पठाइएको थियो । माघ १३ गते इलाका प्रहरी कार्यालय बिर्तामोडमा खबर प्राप्त हुनासाथ प्रहरी टोली खटिगई कार र कार चालक बिर्तामोड ५ बस्ने ३० वर्षीय विशाल बिकलाई नियन्त्रणमा लिएको थियो ।
जेठ १० गते घाइते अंशुलाई थप उपचारको लागि बीएण्डसी अस्पताल ल्याइएको थियो । उपचारका क्रममा आइतवार बिहान ७ बजे उनको मृत्यु भएको हो । घटनाको जानकारी प्राप्त भएपश्चात् कार चालक विकलाई नियन्त्रणमा लिन समन्वय भइरहेको जिल्ला ट्राफिक प्रहरी कार्यालय झापाले जनाएको छ ।
