झापा । झापाको भद्रपुर ८ स्थित मेची रङ्गशालामा स्वर्गीय आलोक भण्डारी र सञ्जीव गिरीको स्मृतिमा दोस्रो चन्द्रगढी फुटबल प्रतियोगिता २०८२ हुने भएको छ । यही मङ्सिर ११ देखि २० गते सम्म चन्द्रगढी युवा क्लबको आयोजनाका फुटबल प्रतियोगिता सञ्चालन हुने भएको हो ।
आयोजकले मङ्गबार चन्द्रगढीमा पत्रकार सम्मेलन मार्फत खेल सञ्चालन गरिने जानकारी गराएको थियाे । क्लबका अध्यक्ष रोहित सुब्बाले प्रतियोगिताका बारेमा जानकारी गराएका थिए ।
उदघाटन खेलमा वेतना युनाइटेड क्लब मोरङ् र न्यु स्टार क्लब खोपबाडीबिच हुनेछ । खेल सञ्चालनका लागि ओमसाइ पाथिभरा हस्पीटल भद्रपुरले १ लाख रुपैयाँ लगायत खेल प्रेमी ,विभिन्न सङ्घ संस्थाले आर्थिक सहयोग गरेको उनले जनाए ।
प्रतियोगितामा भारतीय सहित आठवटा टिम सहभागि हुनेछन् । फाइनल खेल २० गते सञ्चालन हुनेछ । प्रथम पुरस्कार २ लाख १ हजार र उपविजेताले १ लाख १ हजारसहित ट्रफी पाउने छन् ।
सर्वोत्कृष्ट खेलाडीलाई १० हजार रुपैयाँ त्यसैगरी उत्कृष्ट गोलकिपर, डिफेन्डर, मिडफिल्डर, फरवार्ड, उदीयमान खेलाडीलाइ जनही ५ हजार रुपैयाँ र प्रत्येक खेलको म्यान अफ द म्याचलाइ २१०० रुपैयासहित ट्रफी प्रदान गरिनेछ । हरेक खेल हेर्न टिकट काटेर सहभागि हुने एकजना दर्शकलाइ एक काटुन चाउचाउ,फुटबल जुराफ र फेस टावेल वितरण गरिनेछ ।
पछिल्लो समय युवा लागूऔषध दुब्र्यसन तर्फ फस्दै गएको र सगै फुटबल खेल्ने साथीहरु एक्कासी स्वर्गीय भएकोले उहाँहरुको सम्झनामा साथै खेलबाट केही खेलाडी उत्पादन गर्ने पनि उद्देश्यले प्रतियोगिता आयोजना गरिएको जनाइएको छ ।
कार्यक्रममा स्वर्गीय परिवारका तर्फबाट इन्दीरा गिरी, इन्टरनेट व्यवसायी रामकुमार सिवाकोटी, राष्टि्य खेलाडी राजिव लोप्चन,मेची वहुमुखी क्याम्पसका भद्रपुरका स्ववियु कोषाध्यक्ष प्रतिक रौनियार,क्लबका व्यवस्थापक सुरज यादव लगायतले खेलका बारेमा विचार राखेका थिए ।
खेल सञ्चालनका लागि करिब १५ लाख रुपैयाँ खर्च अनुमान गरिएको आयोजकले जनाएको छ ।
