झापाको बिर्तामोड नगरपालिकाले सम्पत्ति कर वृद्धि गर्ने निर्णय फिर्ता लिएको छ । नगरवासीको विरोधपछि पालिकाले चालु आर्थिक वर्षमा सम्पत्ति कर वृद्धि गर्ने नियर्ण फिर्ता लिएको हो ।
आज बसेको कार्यपालिका बैठकबाट नगरपालिकाले सम्पत्ति करलाई साबिक बमोजिम कायम गर्ने निर्णय गरेको नगरपालिकाका उपप्रमुख नगेन्द्रप्रसाद संग्रौलाले जानकारी दिनुभयो । नगरपालिकाले गत असार १३ गतेको नगर अधिवेशनमा सम्पत्ति करमा हेरफेर तथा विस्तार गर्ने निर्णय गरेको थियो । त्यसको विरोध भएपछि नगरपालिका कर बृद्धि गर्ने निर्णयबाट पछि हटेको हो ।
जिल्लाको तेस्रो ठूलो नगरपालिकाका रूपमा रहेको बिर्तामोडमा सम्पत्ति कर वृद्धिको निर्णयबाट पछि हट्नुपर्दा नगरपालिकालाई २ करोड रुपैयाँभन्दा बढीको घाटा हुने राजस्व शाखाका प्रमुख पदमराज घिमिरेले जानकारी दिनुभयो । गत वर्ष बिर्तामोडमा सम्पत्ति करबाट साढे ४ करोड रुपैयाँभन्दा बढीको राजस्व संकलन भएको थियो । बिर्तामोड नगरपालिकामा चालु आर्थिक वर्षका लागि संघीय सरकारबाट साढे ४ करोड अनुदान घटेर प्राप्त हुने नगर प्रमुख पवित्रादेवी महतारा प्रसाईले बताउनुभयो ।
नगरलाई आवश्यक विकासका लागि थप स्रोतको पहिचान गर्नुपर्ने अवस्थाका कारण सम्पत्ति करमा हेरफेर गरिएकोमा स्थानीयको गुनासोपछि त्यसलाई साबिक बमोजिम नै कायम राख्ने निर्णय भएको उहाँको भनाई छ । करको दर हेरफेर गर्न नपाउँदा नगरस्तरका योजना र कार्यक्रममा असहजता आउने पनि उहाँको भनाई छ ।
