झापाको बिर्तामोड नगरपालिका–३ हटियालाइनस्थित अदुवाखोला पुल नजिक भएको सवारी दुर्घटनामा एक १० वर्षीया बालिकाको मृत्यु भएको छ।
मंगलबार साँझ करिब ७ बजे रामचोकबाट भद्रपुरतर्फ आउँदै गरेको मे १ क ६४३ नम्बरको मिक्स गिट्टी बोकेको ट्रिफरले पैदलयात्री अनुकृति चापागाईलाई ठक्कर दिएको थियो। दुर्घटनामा गम्भीर घाइते भएकी उनलाई तत्काल बिर्तासिटी अस्पताल पुर्याइएको भए पनि उपचारकै क्रममा चिकित्सकले मृत घोषणा गरेका थिए।
मृतक अनुकृति बिर्तामोड–३ निवासी किशोर चापागाईकी छोरी हुन्। उनको शव हाल बिर्तासिटी अस्पतालको शवगृहमा राखिएको छ।
दुर्घटनापछि स्थानीयवासी आक्रोशित बनेका छन्। घटनास्थलमा करिब ४ सय जनाभन्दा बढीको भीड जम्मा भएको थियो भने बिर्ताबजारस्थित प्रहरी चौकीमा समेत करिब १५० जनाले घेराउ गरेका थिए।
प्रहरीले ट्रिफर चालक बुद्धशान्ति गाउँपालिका–१ निवासी ५३ वर्षीय श्यामप्रसाद दाहाललाई नियन्त्रणमा लिई अनुसन्धान सुरु गरेको जनाएको छ। घटनास्थलमा सुरक्षा व्यवस्था कडा पारिएको छ भने दुर्घटनामा संलग्न ट्रिफरलाई समेत प्रहरी नियन्त्रणमा ल्याउने प्रक्रिया जारी रहेको छ।
घटनाबारे थप अनुसन्धान भइरहेको प्रहरीले जनाएको छ।
