झापा / बिर्तामोड नगरपालिका वडा नं. ३ आदर्श टोलमा प्रदेश अनुसन्धान तथा प्रशिक्षण केन्द्र, कलबलगुडी भद्रपुरको जग्गामा काटिएको सय क्युफिट गोलिया काठ बरामद गरिएको छ । डिभिजन वन कार्यालय झापा र सव डिभिजन कार्यालय सुरुङ्गाको संयुक्त टोलीले लुकिछिपी काटिएको ३८ वटा कदम जातका गोलिया आज बरामद गरेको हो । सरकारी जग्गामा रहेको रुख काट्दै गरेको भनेर बिर्तामोड नगरपालिकाले डिभिजन वन कार्यालयलाई जानकारी गराएको थियो ।
प्रदेश अनुसन्धान तथा प्रशिक्षण केन्द्र, कलबलगुडी भद्रपुरको नाममा रहेको ४ विघा जग्गा कल्पना पाठकको परिवारले कमाउँदै आएका छन् । सो जग्गाको छेउमा बग्ने अधुवा खोलाको बगरमा लगभग तीन कठ्ठा जग्गामा लगाइएको कदमको रुख काटिएको हो ।
करिव सयवटा रुख रहेकोमा ७ वटा काट्दै गर्दा वन रक्षकको टोली आइपुगेको थियो । रुख काट्ने र काट्न लगाउनेहरु फरार भएका छन् । त्यस सम्बन्धमा सव डिभिजन कार्यालय सुरुङ्गाका सहायक वन अधिकृत स्वस्तिक नन्दन सुवेदीको संयोजकत्वमा छानविन समिति गठन गरी अनुसन्धान भइरहेको जनाइएको छ ।
