झापा । झापामा यस वर्ष धानको उत्पादनमा बृद्धि भएको छ । गत वर्षभन्दा धान खेतीको क्षेत्रफल घटे पनि धानको उत्पादनमा भने बृद्धि भएको कृषि ज्ञान केन्द्र झापाले जनाएको छ ।
केन्द्रका प्रमुख सागर विष्टले यो वर्ष झापामा ४ लाख ३३ हजार ८०९ दशमलव २५ मेट्रिकटन धान उत्पादन भएको जानकारी दिए। जुन गत बर्षको भन्दा ५ हजार ९ सय ३४ मेट्रिकटन बढि हो । गत वर्ष ४ लाख २७ हजार आठ सय ७५ मेट्रिकटन धान उत्पादन भएको थियो ।
गत बर्षको भन्दा धान खेतीको क्षेत्रफल भने कम रहेको कृषि ज्ञान केन्द्रले जनाएको छ । गत वर्ष ८६ हजार ६२५ हेक्टर क्षेत्रफलमा बर्खेधान रोपाइँ भएकोमा यो वर्ष ८५ हजार ७५० हेक्टर क्षेत्रमा मात्रै धानको खेती भएको छ ।
क्षेत्रफल घटेपनि समयमा रासायनिक मल उपलब्ध हुनु, सिँचाइका लागि समस्या नहुनुजस्ता कारणले धानको उत्पादनमा वृद्धि कृषि ज्ञान केन्द्रका प्रमुख विष्टको भनाई छ । त्यस्तै झापामा यस वर्ष धानको उत्पादकत्व प्रतिहेक्टर ५ दशमलव ०५९ मेट्रिकटन पुगेको छ । गत वर्ष भने धानको उत्पादकत्व प्रतिहेक्टर ४ दशमलव ८९ मेट्रिकटन रहेको थियो । धानको उत्पादनमा वृद्धि संगै यो बर्ष धानको उचित मुल्य प्राप्त भएपछि किसान पनि खुसी बनेका छन् ।
अघिल्लो
वर्षको तुलनामा यस वर्ष २५ देखि ५० प्रतिशतसम्म धानको मूल्य वृद्धि भएपछि
किसान खुसी भएका हुन् । अघिल्लो वर्ष एक हजारदेखि अधिकतम एक हजार दुई सय
रुपियाँ प्रतिमन धान बेचेका किसानले अहिले एक हजार पाँच सयदेखि एक हजार छ
सय रुपियाँसम्मका धान विक्री गरिरहेका छन् ।
