झापा । झापा इनर्जी प्लान्टमा आज दिउँसो आगलागी हुँदा विभिन्न मेसिन तथा उपकरणहरू जलेर नष्ट हुँदाँ करिब ६ कराेड रूपैयाँकाे क्षति भएकाे प्रह्रीले जनाएकाे छ ।
झापाको शिवसताक्षी नगरपालिका–४ फुलचोकस्थित भएकाे घटनाकाे प्रारम्भिक विवरणअनुसार आगलागीबाट करिब ६ करोड रुपैयाँ बराबरको क्षति भएको छ। आगलागीको कारण खुल्न बाँकी रहेको प्रहरीले जनाएको छ। घटनामा कुनै मानवीय क्षति नभएको प्रहरीले जनाएको छ ।
प्लान्टका सञ्चालक शिवसताक्षी–९ दुधेका ५० वर्षीय लाल प्रसाद सावा रहेका छन्। आगलागी नियन्त्रणका लागि इलाका प्रहरी कार्यालय झिलझिलेबाट प्रहरी निरीक्षक सुभास केसीको कमाण्डमा ७ जना तथा इलाका प्रहरी कार्यालय शिवगञ्जबाट प्रहरी सहायक निरीक्षक बेनु बास्कोटाको कमाण्डमा ४ जनाको प्रहरी टोली परिचालन गरिएको थियो।
साथै शिवसताक्षी नगरपालिका र कमल गाउँपालिकाका दमकल, स्थानीय बासिन्दा तथा सुरक्षाकर्मीहरूको संयुक्त प्रयासमा आगो पूर्ण रूपमा नियन्त्रणमा आएको प्रहरीले जनाएको छ।
