झापा / सामाजिक सञ्जालमार्फत भ्रम फैलाएको र चरित्र हत्या गरेको आरोपमा पक्राउ परेकी अभियन्ता वेदिका केसीलाई प्रहरीले थुनाबाहिरै राखेर अनुसन्धान अघि बढाएको छ ।
बुधवार मध्यान्ह पक्राउ परेर साँझ हाजिर जमानीमा रिहा भएकी केसीसँग साइबर ब्युरोका अनुसन्धान अधिकृतहरूले बयान लिइरहेका छन् । उनको बयान पुरा भएको छैन ।
केसीलाई हाजिर जमानीमा राखेर अनुसन्धान भइरहेको साइबर ब्युरोका एसपी दिलीप गिरीले बताए । उनले भने, ‘हिरासतमा राखेका छैनौँ, हाजिर जमानीमा राखेर अनुसन्धान भइरहेको छ ।’
मोरङको विराटनगर स्थायी घर भई हाल काठमाडौंको जोरपाटी बस्ने २२ वर्षीया केसीलाई नेपाल प्रहरीको केन्द्रीय साइबर ब्यूरो भोटाहिटीको टोलीले जोरपाटीबाटै नियन्त्रणमा लिएको थियो । सामाजिक सञ्जालमा धर्मभित्रका गलत प्रवृत्ति र अन्धविश्वासविरुद्ध आवाज उठाउने अभियन्ताका रूपमा चिनिएकी कक्षा १२ सम्म अध्ययन गरेकी केसीविरुद्ध कथावाचिका राधिका दासीले उजुरी दिएकी थिइन् ।
