बारास्थित बिश्रामपुर गाउँपालिका–३ डम्पिङ साईटमा गोली चलाएर प्रहरीले नियन्त्रणमा लिएको भारतीय सार्प सुटर सुजित कुमार सिंह अहिले अस्पतालमा छन् । मंगलबार राति मुठभेट हुँदा २ राउण्ड गोली चलाएर उनलाई नियन्त्रणमा लिइएको जिल्ला प्रहरी कार्यालय बाराका एसपी सुरेश काफ्लेले बताए । अहिले उनको बारा सदरमुकाम कलैयास्थित प्रादेशिक अस्पतालमा उपचार भइरहेकोछ ।
सिंह बाराको बाल एकता बोर्डिङका प्रिन्सिपल रुपेश स्वर्णकारको हत्यामा संलग्न रहेको प्रहरीको निष्कर्ष छ । कार्तिक १३ गते खाजा लिएर फर्किरहेका स्वर्णकारको हत्या भएको थियो ।
भारत मोतिहारी जिल्लाको छौडादानो पञ्चायतस्थित तिनकुनि घर भएका सुजित कुमार सिंह सार्प सुटर हुन् । ३२ वर्षीय सिंह ‘कन्ट्याक्ट किलर’ को रुपमा तराईमा विभिन्न हत्यामा संलग्न रहेको प्रहरी उपरीक्षक काफ्लेले जानकारी दिए ।
बारास्थित भुताही पुलमा भएको हत्यामा सिंहले गोली चलाएको प्रहरीको अनुसन्धानबाट थाहा भएको छ । २०७९ फागुनमा भारतबाट नेपालमा आएर बसेका एक जना पुरुषको बारामा हत्या भएको थियो । सो हत्यामा सिंहले नै गोली चलाएको प्रहरीको अनुसन्धान निष्कर्ष छ । २०८० असोज ९ मा पचरौतामा गोली प्रहार गरेर भारतीय नागरिक अजित कुमार सिंहको हत्या भएको थियो । आरोपीहरुले भारतबाट नेपालमा ल्याएर अजितको हत्या गरेका हुन् । सुजितले प्रहार गरेको गोलीबाट अजितको हत्या भएको अनुसन्धानमा संलग्न प्रहरी अधिकृतहरु बताउँछन् ।
भारतीय सुटर सिंह बारामा ३ वटा हत्या, रौतहटमा २ वटा र सर्लाहीमा एउटा हत्यामा संलग्न रहेको बताइएको छ । एसपी काफ्ले भन्छन,‘उनी संलग्न घटनाबारे हामी अनुसन्धान गर्दै छौँ ।’ उनी भारतीय प्रहरीको पनि ‘मोस्ट वान्टेड’ सूचिमा छन् ।
सुजित कुमार सिंहको साथबाट प्रहरीले १ थान घरेलु हतियार (पेस्तोल) बरामद गरेको छ । उनी विगत ५ वर्षदेखि बारा, रौतहट र सर्लाहीमा भएका हत्याको घटनामा ‘कन्ट्याक्ट किलर’को रुपमा संलग्न भएको प्रहरीको अनुसन्धान निष्कर्ष छ ।
