भारतबाट ब्राउनसुगर लुकाएर नेपाल भित्र्याउने प्रयासमा झापा मेचीनगर–१४ धाईजन गोलोबारीका २६ वर्षीय सरोज लामिछाने पक्राउ परेका छन्।
गएको राति करिब ९ बजे भारतको पानीट्याङ्कीबाट नेपालतर्फ आइरहेको मे.८ प. १५८५ नम्बरको टीभीएस मोटरसाइकललाई मेचीनगर–६ स्थित पुरानो मेची पुलमा शंका लागेर चेकजाँच गरिएको थियो। जाँचका क्रममा मोटरसाइकलको च्यासिसको प्वालभित्र प्लाष्टिकमा बेरिएको अवस्थामा ब्राउनसुगर लुकाएर ल्याइएको फेला परेको जिल्ला प्रहरी कार्यालय झापाले जनाएको छ।
पक्राउ परेका लामिछानेसँगै झन्डै ४ ग्राम ब्राउनसुगर र प्रयोग गरिएको मोटरसाइकल समेत बरामद गरिएको प्रहरीले जनाएको छ।
