झापा । माओवादीका सांसद सुदन किरातीले गृहमन्त्रीले राजीनामा नदिए संसद्लाई लडाइँको मैदानमा परिणत गरिदिने चेतावनी दिएका छन् ।
भिजिट भिसाको नाममा मानव तस्करी गर्ने नालायक सरकारले आज विश्व सामु नेपालीको छवि धमिलो बनाएको उनले जनाए ।
शनिबार नेकपा (माओवादी केन्द्र) छथर गाउँपालिकाको अधिवेशनलाई सम्बोधन गर्दै उनले गृहमन्त्रीको राजीनामा र प्रधानमन्त्रीले संसद्मा उभिएर जवाफ नदिए हामी संसद्लाई लडाइँको मैदानमा परिणत गरिदिने ठाेकुवा गरे ।
माओवादीले जुन पाइला सारे पनि खुकुरीको धारमा नै टेक्नु पर्ने अवस्था रहेको जिकिर गरे । भ्रष्टाचारको विरोध गर्दा संसद्मा राजावादीसँग उभिनु पर्दा पीँडा भएकाे सुनाए । कथित राजावादीको विरोध गर्दा भ्रष्टाचारीहरूसँग उभिनु पर्दा झन् पीडा हुने जनाए । राजनैतिक र नैतिक रूपमा हामी माओवादीलाई निक्कै सङ्कट छ । किनभने हामी माओवादी गणतन्त्रको जनानी हौ । भ्रष्टाचार हाम्रो शत्रु हो । त्यसैले भ्रष्टाचार हामी सहन सक्दैनौँ ।’
उनले अब माओवादी आफ्नै खुट्टामा खडा हुनुपर्ने बताउँदै एकचोटी गणतन्त्रको पक्षमा बलिदानी पूर्ण ढंगले गर्जिनुपर्ने जिकिर गरे । उनले सँगसँगै भ्रष्टाचारीहरूको भण्डाफोर गर्दै जानुपर्ने बताए ।
