झापा । वडा प्रहरी कार्यालय भद्रपुरबाट सरूवा भएर इलाम पुगेका प्रहरी इन्स्पेक्ट २०८२ सालको वैशाख महिनाको लागि “उत्कृष्ट प्रहरी” (Police
of the Month) को रुपमा घोषणा गरिएको छ। जिल्ला प्रहरी कार्यालय इलाममा कार्यरत प्रहरी इन्स्पेक्टर संजीब बोगटीलाई घाेषित गरिएकाे हाे ।
बाेगटीले लागूऔषध नियन्त्रण तथा जघन्य अपराध अनुसन्धानमा देखाएको अद्वितीय समर्पण, व्यावसायिक दक्षता र सफल कारबाहीको मूल्याङ्कनस्वरूप उनलाई सो सम्मान प्रदान गरिएको जनाइएकाे छ । बोगटीले इलाम जिल्लाका विभिन्न स्थानमा विशेष रणनीतिक अभियान सञ्चालन गरी लागूऔषधसहितका अभियुक्तलाई नियन्त्रणमा लिनुका साथै फरार रहेका अपराधीहरूलाई पनि पहिचान गरी पक्राउ गर्न महत्वपूर्ण भूमिका निर्वाह गरेका छन्।
बोगटी अनुसन्धानमा खटिँदै जघन्य अपराधका रहस्य फेला पार्न सफल भएकाे उल्लेख छ । घटनामा संलग्न व्यक्तिहरूलाई वैज्ञानिक र प्रमाणमा आधारित अनुसन्धान प्रविधिको प्रयोग गरी कानुनी दायरामा ल्याउन उनले सफल प्रयास गरेकाे जनाइएकाे छ । जिल्ला प्रहरी कार्यालय इलामका एसपी एकनारायण कोइरालाले बोगटीको कार्यसम्पादनप्रति प्रशंसा गरेका छन् । बोगटीले देखाएको साहस, लगनशीलता र निष्ठा प्रहरी संगठनको गौरव भएकाे उनले प्रतिकिया दिए । यस्ता कर्मठ प्रहरीकै कारण नागरिकमा प्रहरीप्रतिको विश्वास अझ मजबुत भएको उनकाे भनाइ छ ।
उत्कृष्ट प्रहरीको रुपमा घोषित भएपछि बोगटीले यो सम्मान आफ्नो लागि
मात्र नभई सम्पूर्ण प्रहरी टोलीको सामूहिक प्रयासको फल भएको प्रतिक्रिया
दिएका छन्।बाेगटी वडा प्रहरी कार्यालय भद्रपुरबाट केही महिना अघि सरूवा भएका थिए ।
