झापा ।वडा प्रहरी कार्यालय भद्रपुरको शान्ति सुरक्षा फितलो बन्दै गएपछि नगरमा
चोरीका घटना राेकिएकाे छैन । भद्रपुर–६ स्थित संगम चोकबाट एउटा सिटी सफारी चोरी भएको छ । स्थानीय
लालबहादुर साहको प्र–१–०१–०९ ह १८३७ नम्बरको रातो रङ्गको सिटी सफारी बिहीबार राति चोरी
भएको हो । घर अगाडि पार्किङ गरी राखिएको सफारी चोरी भएपछि उनले शुक्रबार
बिहान वडा प्रहरी कार्यालय भद्रपुरमा उजुरी दिएका छन् । त्यसको एक साताअघि
माघ ११ गते भद्रपुर– ६ निवासी हेमन्त सुरानाको घरबाट नगद र सुन चोरी भएको
थियो ।
घरमा कोही नभएको मौका छोपी दिउँसोको समयमा चोरी भएको पीडित सुरानाले
जानकारी दिए । उनको घरको कोठाबाट ४ तोला सुन र ७० हजार नगद चोरी भएको हो ।
उनले घरमा चोरी भएको बारेमा वडा प्रहरी कार्यालयलाई जानकारी गराएपनि
हालसम्म प्रहरीले घटनाको सुइँको समेत पत्ता लगाउन सकेन ।
त्यसैगरी माघ १७ गते भद्रपुर नगरपालिका–१ सोमबारे स्थित साना किसान सहकारी संस्थामा चोरी भएको थियो । कार्यालयको झ्यालको पल्ला र ग्रिल फोडेर चोर भित्र प्रवेश गरी लकर समेत फोडेर लकर भित्री रहेको नगद ३ लाख २ हजार ९७६ रुपैयाँ र सिसी क्यामेराको हार्ड डिस्क चोरी गरेको थियो । सो घटनाको बारेमा पनि केही पत्ता लागेको छ ।
नगरमा चोरीका घटना बढेसँगै प्रहरी गस्ती बढाएको वडा प्रहरी कार्यालय भद्रपुरका इन्स्पेक्टर सञ्जीव बोगटीले बताए । अहिलेसम्म चोर भने फेला परेको छैन । सिसी क्यामेराले काम नगर्दा चोर समात्न समस्या भइरहेको उनले बताए । घटनामा संलग्नताको पहिचानका लागि शङ्कास्पद व्यक्तिलाई नियन्त्रणमा लिएर सोधपुछ गरिरहेकाे उनले बताए ।
शान्ती सुरुक्षा चुस्त दुरूस्त बनाउन नसक्ने प्रहरीले सीसी क्यामरा बिग्रेकाे भन्दै पन्सिएकाे छ । सीसी क्यामेराकाे भर पर्दा भद्रपुरमा चाेरीका घटना बढेकाे प्रष्ट हुन्छ ।
