झापा । ग्राहकले भद्रपुर –काठमाडौं हवाई सेवाका लागि टिकट गर्न यति नै रकम लाग्छ भन्ने टुंगो हुँदैन ।
एयरलाइन्सहरुको जति पनि भाडादरमा पर्न सकिन्छ । जुन सर्वसाधारणको हैसियतभन्दा बाहिरको कुरा हो । एयरलाइन्सले अधिकतम १२ हजार ३२० रुपैयाँसम्म हवाई शुल्क लिएपछि सर्वसाधारण यात्रु मारमा परेका छन् । एयरलाइन्सहरुले भद्रपुर–काठमाडौका लागि ६ हजार ४०० देखि १२ हजार ३२० रुपैयाँसम्म भाडा दर तोकेका छन् । सर्वसाधारणका लागि सस्तोमा टिकट पाउनु भाग्यको कुरा । आफूले भएभरका एयरलाइन्समा बुझ्दा कुनै पनि एयरलाइन्समा सस्तो टिकट नपाएको एक यात्रुले बताए । उनले सबै एयरलाइन्सले कार्टेलिङ गरेर महँगोमा मात्र टिकट बेचिरहेको आरोप लगाए ।
एयरलाइन्सहरुले तोकिएको दररेटभन्दा बढी भाडा लिन नपाउने भद्रपुर विमानस्थलका सहायक प्रवन्धक किशोरकुमार खत्रीले बताए । उनले तोकिएकोभन्दा बढी भाडा लिए उजुरी गर्न आग्रह गरे । भद्रपुरदेखि काठमाडौ तीनवटा एयरलाइन्सका ९ वटा विमानले दैनिक उडान भर्दै आएका छन् । बुद्ध , यति र सौर्य एयरलाइन्सले सो सेवा दिँदै आएका हुन् ।
२०७८ सालमा सबैभन्दा सस्तो हवाई टिकट रहेको थियो । भद्रपुर–काठमाडौँ उडानको लागि त्यतिबेला बुद्ध एयरले प्रतियात्रु न्यूनतम् भाडा रु एक हजार ५००, यति एयरले रु एक हजार ३९५, सौर्य एयरले रु एक हजार ४०० र श्री एयरले रु एक हजार ४०० तोकेको थियो ।
