झापा / तराईमा लागेको बाक्लो हुस्सु र कुहिरो अझै तीन दिनसम्म रहने भएको छ ।
पश्चिमी वायु सक्रिय हुन नसकेकाले हुस्सु कुहिरो थप बढेको जल तथा मौसम विज्ञान विभागले जानकारी दिएकाे छ ।
विभागले बाक्लो हुस्सु र कुहिरो अझै तीन दिन कायम रहने भएकाले आवश्यक सावधानी अपनाउन सबैमा अनुरोध गरेको छ । विभागले जनजीवन, स्वास्थ्य, सडक तथा हवाई यातायातमा प्रभाव पार्न सक्ने उल्लेख गरेको छ ।
विभागका मौसमविद् हरिप्रसाद दाहालले मंगलबार पनि देशको तराईका धेरै ठाउँमा हुस्सु/कुहिरो लागेको जानकारी दिए । उनले भने, “आगामी तीन दिनमा उल्लेख्य सुधार हुने सम्भावना नरहेकाले दैनिक जनजीवन, स्वास्थ्य, सडक तथा हवाई यातायातलगायत क्षेत्रमा प्रभाव पर्ने देखिएकाले आवश्यक सतर्कता अपनाउन सबैमा अनुरोध छ ।”
