झापा / नेपालका प्रधानमन्त्री बालेन्द्र शाह (बालेन) को भारत भ्रमणबारे नेपाल र भारत बीच सैद्धान्तिक सहमति भएको छ । तर भ्रमणको मिति भने अझै तय हुन बाँकी रहेको छ ।
परराष्ट्र मन्त्रालयका अनुसार भ्रमणअघि आवश्यक कूटनीतिक तथा प्राविधिक तयारी पूरा गर्नुपर्ने भएकाले तत्काल भ्रमण नहुने जनाइएको छ । दुई देशबीच एजेन्डा तय, समन्वय र तयारीपछि मात्र औपचारिक भ्रमण हुने बताइएको छ ।
यसअघि नरेन्द्र मोदी ले बालेनलाई बधाई सन्देशमार्फत भारत भ्रमणको निम्तो दिएका थिए । त्यसको जवाफमा बालेनले उपयुक्त समयमा भारत भ्रमण गर्ने प्रतिबद्धता जनाएका थिए ।
परराष्ट्रमन्त्री शिशिर खनालले भारतीय समकक्षीसँग भएको छलफलमा पनि भ्रमणबारे सकारात्मक सहमति बनेको जानकारी दिएका छन् ।
नेपाल–भारत सम्बन्धका दृष्टिले यस भ्रमणलाई महत्वपूर्ण मानिएको छ । सम्भावित भ्रमणले व्यापार, ऊर्जा, पूर्वाधार र कूटनीतिक सहकार्यका क्षेत्रमा नयाँ गति दिने अपेक्षा गरिएको छ ।
