झापा । झापाको मेचीनगर नगरपालिकाले शिक्षा क्षेत्रका ९७ जनालाई सम्मान गरेको छ । नगरका सामुदायिक तथा निजी शैक्षिक संस्थाका शिक्षक, कर्मचारी, व्यवस्थापन समिति, विभिन्न संस्थागरी ९७ जनालाई नगरपालिकाको शिक्षा शाखाले सम्मान तथा पुरस्कृत गरेको हो । नगरपालिकाको शिक्षा यूवा तथा खेलकुद शाखाले आयोजना गरेको सम्मान तथा पुरस्कार वितरण समारोह २०८० कार्यक्रममा कक्षा ८ को परीक्षामा सर्वाेत्कृष्ट अंक ल्याउने विद्यार्थी ४२ जना, अवकाश प्राप्त शिक्षक १९ जना, अवकाश प्राप्त कर्मचारी, उत्कृष्ट शिक्षक, विद्यालय व्यवस्थापन समिति, बाल क्लब, नृत्य प्रतियोगितामा प्रदेशमा नै उत्कृष्ठ हुने र स्काउट तथा बाल शिक्षक तीन जनालाई सम्मान तथा पुरस्कृत गरिएको थियो ।
काकडभिट्टास्थीत सामुदायिक भवनमा आयोजित कार्यक्रमकाबिच उत्कृष्ट प्रधानध्यापकका रुपमा पाँच जना, कक्षा १० र कक्षा १२ बाट उत्कृष्ट विद्यार्थी गरी ९७ जनालाई पुरस्कृत तथा सम्मान गरिएको नगर शिक्षा शाखाले जनाएको छ । नगरका सामाजिक विकास समिति संयोजक हृदय राजवंशीको अध्यक्षतामा भएको कार्यक्रममा उपप्रमुख मीना पोखरेल उप्रेतीले नगरपालिकाको आम्दानीको स्रोत घटेका कारण शिक्षा क्षेत्रमा पर्याप्त बजेट छुट्याउन नसकेको बताइन् ।
कार्यक्रममा नगरका प्रमुख प्रशासकीय अधिकृत टेककुमार रेग्मी, वडा नं ६ का वडाअध्यक्ष ललितबहादुर तामाङ, नेपाल शिक्षक महासंघ मेचीनगर अध्यक्ष लेखनाथ पौडेल, राष्ट्रिय नीजि तथा आवासीय विद्यालय अर्गनाईजेसन प्याव्सनका मेचीनगर अध्यक्ष डम्बर रुचाल लगायतले शुभकामना मन्तव्य राखेका थिए ।
नगरका
शिक्षा शाखा प्रमुख होमनाथ भण्डारीले स्वागत मन्तव्य राखेको कार्यक्रम
शिक्षा अधिकृत पवित्रा ढकालको सञ्चालनमा सम्पन्न भएको थियो । नगर शिक्षा
शाखाका अनुसार नगरभित्र सामुदायिक तर्फ १७ मावि, ११ निमाबि, १४ प्राथमिक, ४
वटा धार्मिक तथा ६० वटा संस्थागत गरी कुल एकसय ६ वटा शैक्षिक संस्था रहेका
छन् ।
