झापा / अमेरिकी राष्ट्रपति डोनाल्ड ट्रम्पले इरानविरुद्ध युद्ध सुरु गर्ने आफ्नो निर्णयप्रति कुनै पछुतो नरहेको बताएका छन्। आगामी अमेरिकी मध्यावधि निर्वाचनमा युद्धको असर पर्न सक्ने चिन्ता भइरहेका बेला ट्रम्पले आफूले लिएको सैन्य निर्णयको खुलेर बचाउ गरेका हुन्।
फक्स न्युजकी प्रस्तोता लाउरा इन्ग्राहमसँगको अन्तर्वार्तामा ट्रम्पले आफू ‘पछुतो’ भन्ने शब्दमा विश्वास नगर्ने बताए। उनले युद्ध सुरु गर्ने निर्णय पुनः लिनुपर्ने अवस्था आए पनि आफूले त्यही निर्णय दोहोर्याउने स्पष्ट पारे।
ट्रम्पका अनुसार इरानलाई आणविक हतियार विकास गर्नबाट रोक्नु नै अमेरिकी सैन्य कारबाहीको प्रमुख उद्देश्य हो। उनले इरानको आणविक क्षमता कमजोर पारिएको दाबी गर्दै आफ्ना समर्थकहरू युद्धका कारण निराश नभई आफूले इरानलाई आणविक हतियार बनाउन नदिएकोमा गर्व गरिरहेको बताएका छन्।
ट्रम्पले युद्ध कहिलेसम्म चल्छ भन्ने विषयमा पनि निर्वाचनसँग जोडिएको संकेत दिएका छन्। उनका अनुसार नोभेम्बरमा हुने मध्यावधि निर्वाचनपछि युद्ध अन्त्य हुने सम्भावना छ। उनले यसअघि पनि युद्ध निर्वाचनपछि सकिने दाबी गरेका थिए।
अमेरिका र इजरायलले फेब्रुअरी २८ मा इरानमाथि संयुक्त सैन्य हमला सुरु गरेपछि इरानले पनि इजरायल तथा खाडी क्षेत्रमा रहेका अमेरिकी सैन्य आधारतर्फ जवाफी आक्रमण गर्दै आएको छ। महिनौँदेखि जारी द्वन्द्वका कारण हजारौँ मानिसको मृत्यु, लाखौँ विस्थापन तथा ऊर्जा आपूर्तिमा गम्भीर असर परेको छ।
युद्धका कारण तेल तथा ग्यासको मूल्य बढ्नु अमेरिकी राजनीतिमा समेत ठूलो मुद्दा बनेको छ। मध्यावधि निर्वाचन नजिकिँदै गर्दा युद्धको आर्थिक प्रभावले ट्रम्प र उनको रिपब्लिकन पार्टीमाथि राजनीतिक दबाब बढाइरहेको बताइएको छ।
यसबीच इरानले आफ्नो आणविक कार्यक्रम शान्तिपूर्ण उद्देश्यका लागि भएको दाबी गर्दै आएको छ। अमेरिका भने इरानलाई आणविक हतियार विकास गर्न नदिने अडानमा छ। जारी सैन्य द्वन्द्वको अन्त्यका लागि कूटनीतिक प्रयास भइरहे पनि हालसम्म स्थायी समाधान निस्कन सकेको छैन।
