भद्रपुर नगरपालिका–६ स्थित देवकोटा स्मृति भवनको प्राङ्गणमा नवनिर्मित खुला व्यायामशालामा भ्रष्टाचार भएको उजुरी उपर छानबिन शुरु भएको छ ।अख्तियार दुरुपयोग अनुसन्धान आयोगको टोलीले साउन ३० गते स्थलगत अनुगमन गरेको छ । स्थानीयबासीले निर्माण कमसल भएको भन्दै अख्तियारमा उजुरी गरेपछि आयोगको टोलीले आकस्मिक अनुगमन गरेको हो ।
टोलीले निर्माण कार्यबारे स्थानीयबासी र सरोकारवालाहरूसँग सोधपुछ गरी मुचुल्का उठाएर लगेको रोहवरमा उपस्थित वडा नम्बर ६ का वडाध्यक्ष रतिया राजवंशीले बताए । भद्रपुर नगरपालिकाले गत आर्थिक वर्ष २०८०/२०८१ मा देवकोटा भवनको प्राङ्गणमा रहेको खाली जग्गामा खुला व्यायामशाला निर्माणका लागि १० लाख रुपैयाँ बजेट छुट्याएको थियो ।
देवकोटा स्मृति भवनकै कार्यसमितिले नगरपालिकाको रेखदेख र निर्देशनमा उक्त व्यायामशाला निर्माण गरिएको हो । टोयज् पार्क एन्ड गिफ्ट बिर्तामोडले निर्माण गरेको उक्त व्यायामशाला बनाउनका लागि नगरपालिकाले नै बोलपत्र आह्वान गरेको भवनका अध्यक्ष राजेन्द्र चापागाईँ बताउँछन् ।
उनका अनुसार निर्माणकर्तालाई ७ लाख ९७ हजार रुपैयाँ भुक्तानी गरिसकिएको छ । ‘गिटी, बालुवा, ढुङ्गा, सिमेन्ट र मिस्त्री बापत एक लाख रुपैयाँ खर्च भएको छ’, उनले भने, ‘दुई वर्षसम्म टुटफुट भएमा बनाइदिने सर्तमा ठेकेदारको ५० हजार रुपैयाँ राखेका छौँ ।’अख्तियारको तीन सदस्यीय टोली अनुगमन आएको बारेमा जिज्ञासा राख्दा वडाध्यक्ष राजवंशीले भने, ‘काममा त्रुटि भए सोको कारबाही सम्बन्धित पक्षले भोग्नुपर्छ, नगरपालिकाको बजेट दुरुपयोग गर्न पाइँदैन ।’
भद्रपुर–६ का निवर्तमान वडाध्यक्ष प्रेम बरुवाल भन्छन्, ‘मैले शुरुदेखि नै व्यवस्थित ढंगले बनाउनु पर्छ भन्दै आएको हुँ, तर नगरपालिकाको बजेट, नगरपालिकाकाकै अघि दुरुपयोग भएको छ, दोषीमाथि कारबाही हुनै पर्छ ।’ भवनका कोषाध्यक्ष बद्री आचार्यले उपकरण जडानमा कमीकमजोरी भएको स्विकार्दै इस्टिमेट अनुसार काम भएको दाबी गरे । पछिल्लो समय झापाका विभिन्न स्थानीय तहले खुला व्यायामशाला निर्माण गरेका छन् । अन्यत्र निर्माण भएका व्यायामशाला यहाँ बनेको तुलनामा सस्तो र राम्रो भएको जानकारहरू बताउँछन् ।
