झापा / प्रहरी हुँ भन्दै विभिन्न व्यक्तिहरूबाट रकम असुल गर्ने कार्यमा संलग्न एक युवकलाई सुनसरी प्रहरीले पक्राउ गरेकाे छ ।
सुनसरीकाे इनरुवा नगरपालिका–९ निवासी ३० वर्षीय पवन मेहेताले आफू जिल्ला प्रहरी कार्यालय सुनसरीमा सादा पोशाकमा खटिएको कर्मचारी हुँ भन्दै सर्वसाधारणलाई धम्की दिई रकम असुल गर्दै आएको सूचनाको आधारमा पक्राउ गरेकाे हाे ।
प्रहरीको टोलीले उनलाई साउन ८ गते साँझ ७:०० बजेकाे समयमा भोक्राहा नरसिंह गाउँपालिका–५, चप्राहा क्षेत्रबाट को १५ प ८८७ नम्बरको मोटरसाइकलसहित नियन्त्रणमा लिएको हो।
उक्त कार्यमा संलग्न रहेकाले उनलाई अस्थायी प्रहरी पोस्ट पोखरीचोक तथा जिल्ला प्रहरी कार्यालय सुनसरीबाट खटिएको टोलीले नियन्त्रणमा लिई अनुसन्धान अघि बढाएको जिल्ला प्रहरी कार्यालय सुनसरीले जनाएको छ।
हाल यस सम्बन्धमा थप अनुसन्धान भइरहेको प्रहरीले जानकारी दिएको छ।
