झापा । प्रतिनिधि सभा सदस्य पदका लागि एमालेबाट उम्मेदवार बनेका झापा क्षेत्र नम्बर ५ का केपी शर्मा ओलीले जतिसुकै विरोध गरे पनि एमाले पहिलो दल बन्ने बताएका छन् । ओलीले मंगलबार झापा ५ का मतदातासँग कुराकानी गर्दै जतिसुकै विरोध गरे पनि एमाले पहिलो दल बन्ने बताएका हुन् ।ओलीले एमालेलाई सिध्याउन देशमै आगो लगाएको टिप्पणी गरेका छन् ।
देशमा अराजकता र आतंक मच्चाउनेले नेपाली हुँ भन्न पनि सरम मान्नुपर्ने ओलीले बताए । ‘आगजनी गर्नु, अरूको सम्पत्ति आगजनी गर्नु, सार्वजनिक सम्पत्ति, राज्यको सम्पत्ति आगजनी गर्नु, तोडफोड गर्नु, लुटपाट गर्नु, नेपाली हुँ भन्ने मान्छेलाई सरम हुनुपर्दछ,’ ओलीले भने ।
देशमा आगजनी र लुटपाट मच्चाउनेहरू देशका दुस्मन र आतंककारी भएको पनि ओलीले टिप्पणी गरे । ‘जसले जलाए, ती देशका दुस्मन हुन्, ती आतंककारी हुन् । जसले सिंहदरबार जलाए, जसले संसद् भवन जलाए, सर्वोच्च अदालत जलाए’, ओलीले भने ।
देशका सम्पत्ति जलाएर क्रान्ति नहुने बताउँदै उनले भएका विकास निर्माण जलाउनेले देश बनाउन नखोजेको दाबी गरे ।
