फायल तस्वीर
झापा । चालु आर्थिक वर्ष ०८१/८२ को साउनदेखि चैतसम्म नौ महिनाकाे अबधिमा झापामा दुर्घटनामा परी ७० जनाले ज्यान गुमाएका छन् । साे अबधिमा नौ सय ६६ सवारी दुर्घटना हुँदा उबक्त मानवीय क्षति भएको हो ।
जिल्ला ट्राफिक कार्यालय झापाकाे तथ्याङ्क अनुसार ज्यान गुमाउनेमा ५३ पुरुष, १२ महिला र पाँच बालबालिका रहेका छन् । साेही अबधिमा दुर्घटनामा परी एक सय १७ जना घाइते, एक हजार ४२७ जना सामान्य घाइते भएका छन् ।
त्यस अवधिमा एक हजार ४१३ सवारीसाधन दुर्घटना भएकामा त्यसमा सबैभन्दा धेरै आठ सय ७६ मोटरसाइकल, एक सय ६२ टेम्पो, एक सय ४१ जीप कार, ४५ बस, २८ ट्याक्टर, २२ ट्रक, सात टिपर, दुई÷दुई डोजर र माइक्रो तथा सात वटा अन्य सवारीसाधन रहेका प्रहरी निरीक्षक गणेश पौडेलले जानकारी दिए ।
कार्यालय प्रमुख पौडेलले त्यस अवधिमा ट्राफिक नियम उल्लङ्घन गर्ने ४५ हजार ५९४ सवारीसाधन कारबाहीमा परेका बताए। उनका अनुसार कारबाहीबाट तीन करोड चार लाख दुई हजार राजस्व सङ्कलन भएको जनाए ।
दुर्घटना न्यूनीकरण गर्न ट्राफिक प्रहरीले सवारी चालकलाई लक्षित गरी विभिन्न जनचेतना मूलक कार्यक्रम गर्दै आएको छ। नौ महिनामा चार हजार १३४ पटक जनचेतना मूलक कार्यक्रम हुँदा एक लाख ६५ हजार दुई ४९ जना मानिस लाभान्वित भएका कार्यालयले जनाएको छ । रासस
