झापा । भद्रपुरस्थित प्रादेशिक अस्पतालमा निरन्तर रूपमा भइरहेको चोरी घटनामा संलग्न तीन जना व्यक्तिहरूलाई प्रहरीले पक्राउ गरेको छ।
पहिलो घटनामा, २०८२ साल कार्तिक ३ गते दिउँसो अन्दाजी १४:०० बजे अस्पतालको पुरानो सर्जिकल वार्ड बाहिरबाट अक्सिजन सप्लाईका लागि जडान गरिएको तामाको पाइप चोरी गर्ने झापा भद्रपुर–६ बस्ने ३७ वर्षीय रन्जित घोष पक्राउ परेका हुन्।
त्यसैगरी, दोस्रो घटनामा २०८२ साल कार्तिक १८ गते दिउँसो अन्दाजी १:३० बजे अस्पतालको गाइनो वार्डको पहिलो तलाबाट अक्सिजन पाइप चोरी गरिरहेको अवस्थामा भद्रपुर–१० बस्ने ३० वर्षीय सुरज जमदारलाई प्रहरीको निगरानी क्यामेरा (CCTV) फुटेजमा देखिएपछि कार्तिक २३ गते पक्राउ गरिएको छ। जमदार साेही अस्पतालमा स्वीपरमा कार्यरत कर्मचारी हुन् । जमदारबाट तीन किलाे तामाकाे तार समेत प्रहरीले बरामद गरेकाे छ ।
तेस्रो घटनामा, २०८२ साल कार्तिक २२ गते राति ११:०० बजेतिर अस्पतालको औषधी स्टोर कोठाबाट METHADOOL (मेथाडोल) नामक झोल औषधी चोरी गरेको CCTV फुटेजबाट प्रमाणित भएपछि मेचिनगर–७ बस्ने २८ वर्षीय विश्वनाथ राजवंशीलाई कार्तिक २३ गते प्रहरीले पक्राउ गरेको हो।
प्रहरीका अनुसार, पक्राउ परेका तीनै जनामाथि मुलुकी अपराध संहिता २०७४ अन्तर्गत चोरी सम्बन्धी कसुरमा मुद्धा दर्ता गरी अनुसन्धान जारी छ। जिल्ला अदालत झापाबाट पहिलो पटकका लागि ५ दिनको म्याद लिई अनुसन्धान भइरहेको जिल्ला प्रहरी कार्यालय झापाले जनाएको छ।
