झापा । वाइसीएल नेपालले आज मेची राजमार्गमा आव्हान गरेको चक्काजाम स्थगित गरेको छ ।आक्रमणमा संलग्नलाई पक्राउ गरी कार्वाही गर्न माग गर्दै आज मेची राजमार्गमा बन्द आव्हान गरेको थियाे ।
बुद्धशान्तिका वाइसीएल अध्यक्ष पंकज शेर्पामाथि आइतबार भएको आक्रमणको घटनामा संलग्न मेचीनगर–१२ घर भएका बालकुमार विष्ट र नविन विष्टलाई पक्राउ गरी कार्बाही गर्नका लागि दबाब दिन वाइसीएलले मेची राजमार्गमा चक्काजाम आव्हान गरेको थियो ।
हिजो नेकपा एमाले , नेपाली कांग्रेस र नेकपा माओवादीका प्रतिनिधिहरुबीच
छलफल भएर मौखिक सहमति भएकोले वाइसीएलले चक्काजाम स्थगित गरेको बताइएको छ ।
उनीहरुबीच आज बिहान लिखित सहमति हुने जनाइएको छ । पार्टी प्रतिनिधिबीच
सहमति भएको कुरा सुनेर आफूहरुले चक्काजाम स्थगित गरेको वाइसीएल नेपाल
झापाका अध्यक्ष डेबिट शाही ठकुरीले बताए ।
मेची राजमार्ग सडकखण्डअन्तर्गत मेचीनगर–१२ स्थित सहरेडाँगी उत्तर सडकमा हातहतियारसहित विष्टद्वयले शेर्पालाई आक्रमण गरेको वाइसीएल नेपाल झापाले दावी गरेको छ ।ट्याक्सी चालकले अनियन्त्रित ढंगले सवारी चलाएको र सो सवारी चालकलाई शेर्पाले रोक्न लगाई सम्झाई बुझाई गरेसँगै घटना मिलिसकेको अवस्थामा पूर्वाञ्चल ट्याक्सी व्यवसायी संघका अध्यक्षसमेत रहेका बालकुमार विष्ट र उनका भाइ नबिन विष्टले एक्कासि घरेलु हतियार, बाईकको हेल्मेटले शेर्पालाई अन्धाधुन्ध प्रहार गरी घाइते बनाएको वाइसीएल प्रदेश अध्यक्ष कुमार आचार्यले दावी गरे । शेर्पाको बीएण्डसी अस्पतालमा उपचार भइरहेको उनले बताए ।
