झापा । नेपालमा २०७२ को भुकम्पले क्षति पुर्याए पछि निर्माणको क्रममा
रहेको काठमाण्डौंको सुन्धारास्थित नवनिर्मित धरहरा ३ असोजदेखि अस्थायी
रुपमा सञ्चालन हुने भएको छ । मन्त्रिपरिषद बैठकले संविधान
दिवशको अवसर पारेर ३ असोजदेखि धरहरा अस्थायी रुपमा सञ्चालनमा ल्याउने
निर्णय गरेको स्रोतले जानकारी दिएको छ ।
धरहरा सञ्चालनको जिम्मेवारी संघीय सरकारको शहरी विकास मन्त्रालयलाई दिइएको छ । २०७२ को भूकम्पले भत्किनुअघि संघीय सरकारले काठमाडौं महानगरपालिकालाई धराहरा सञ्चालन तथा व्यवस्थापनको जिम्मा दिएको थियो । महानगरपालिकाले एक निजी कम्पनीलाई ठेक्कामा दिएको थियो ।
बैठकले धरहरा सञ्चालनसम्बन्धी यसअघिका सबै निर्णय
खारेज गरेको जनाएकाे छ । बाहिरबाट हेर्दा पुरानै
डिजाइनको ११ तला जस्तो देखिने धरहरामा अहिले भित्री संरचना २२ तलाको छ ।
यसको उचाइ जमिनबाट ८३.५८ मिटर छ । १९९० सालको भूकम्पअघि धरहरा ११ तला अग्लो
थियो । त्यसबेला २ तला भत्किएर ९ तलामा सीमित बनेको थियो ।
अब यसमा दुइटा लिफ्ट जडान गरी धरहरा चढ्न सकिने सुविधा मिलाइँदै छ ।
भूकम्पले भत्किएको पुरानो धरहरा संरचना भग्नावशेष भने खुलारूपमा अवलोकन
गर्न सकिने गरी सुरक्षित राखिएको छ । धरहरा टावरमुनि तीन तले भूमिगत
पार्किङ बनाइएको छ । प्रशासनिक भवन र संग्रहालय समेत यहाँ बन्दैछ ।
