झापा / दक्षिण अमेरिकी राष्ट्र भेनेजुएलामा इतिहासकै विनाशकारी 'जुम्ल्याहा भूकम्प' जाँदा व्यापक जनधनको क्षति भएको छ। बुधबार साँझ गएका लगातार दुईवटा शक्तिशाली भूकम्पका कारण हालसम्म कम्तीमा ३२ जनाको मृत्यु भएको आधिकारिक पुष्टि भएको छ भने ७०० भन्दा बढी नागरिक घाइते भएका छन्।
स्थानीय समय अनुसार बुधबार साँझ ६:०४ बजे ७.२ म्याग्निच्युडको पहिलो भूकम्प गएको थियो। त्यसको ठिक ४० सेकेन्डपछि पुनः ७.५ म्याग्निच्युडको अर्को शक्तिशाली भूकम्प गएपछि राजधानी काराकाससहित देशका विभिन्न भागहरूमा ठुलो विनाश निम्तिएको हो। भूकम्पको केन्द्रबिन्दु काराकासको पश्चिम क्षेत्रमा पर्ने याराकुई राज्यको सान फेलिप र युमारे सहर नजिकै जमिनबाट १० देखि १३ किलोमिटरको कम गहिराइमा रहेको अमेरिकी भूगर्भ सर्वेक्षण (USGS) ले जनाएको छ। बुधबार राष्ट्रिय बिदा (सेन्ट जोन द ब्याप्टिस्ट दिवस) परेकाले धेरैजसो नागरिकहरू घरमै रहेका बेला भूकम्प आएकाले मानवीय क्षति बढेको हो।
विपद्को भयावह स्थिति आएपछि कार्यवाहक राष्ट्रपति डेल्सी रोड्रिगेजले देशभर आपत्काल घोषणा गरेका छन्। राज्य नियन्त्रित टेलिभिजनमार्फत देशवासीका नाममा सम्बोधन गर्दै कार्यवाहक राष्ट्रपति रोड्रिगेजले भने, "यस घडीमा हामीसँग ३२ जनाको मृत्यु भएको आधिकारिक रिपोर्ट छ, तर यसमा सबैभन्दा बढी प्रभावित ला गुइरा राज्यबाट आउन बाँकी विवरण समावेश गरिएको छैन। ला गुइरामा दर्जनौँ भवनहरू ध्वस्त भएका छन् र यो एक वास्तविक त्रासदी हो। हामी अहिले धेरैभन्दा धेरैको जीवन रक्षा गर्न कठीन उद्धार कार्यमा जुटिरहेका छौँ।"
मृतकको यो सङ्ख्या सरकारी अधिकारीहरू र अस्पतालका आपत्कालीन कक्षहरूबाट संकलन गरिएको आधिकारिक तथ्याङ्कका आधारमा पुष्टि गरिएको हो। यद्यपि, भग्नावशेषहरू पन्छाउने काम जारी रहेकाले यो सङ्ख्या प्रारम्भिक मात्र भएको बताइएको छ। अमेरिकी भूगर्भ सर्वेक्षण (USGS) ले यस क्षेत्रका भवनहरूको कमजोर संरचनाका कारण इतिहासमै विरलै जारी गरिने 'रेड अलर्ट' जारी गर्दै मृतकको सङ्ख्या अझै निकै माथि पुग्न सक्ने चेतावनीयुक्त वैज्ञानिक मोडेल सार्वजनिक गरेको छ।
भूकम्पका कारण राजधानी काराकास, चाकाओ र बारुता नगरपालिकामा कैयौँ तलाका आवासीय भवनहरू जगैदेखि भत्किएका छन् भने उत्तरी तटीय राज्य ला गुइरालाई पूर्ण रूपमा 'विपद् क्षेत्र' घोषणा गरिएको छ। भूकम्पका कारण सिमोन बोलिभर अन्तर्राष्ट्रिय विमानस्थलको छत भत्किएपछि हवाई उडानहरू बन्द गरिएको छ भने सबवे र रेल सेवा पूर्ण रूपमा रोकिएको छ। बिजुलीका पोलहरू ढल्दा र पूर्वाधारमा क्षति पुग्दा धेरै क्षेत्रहरू अन्धकारमय बनेका छन् भने इन्टरनेट तथा फोन सेवा अवरुद्ध भएको छ। सम्भावित आगलागी रोक्न प्रभावित क्षेत्रहरूमा ग्यास आपूर्ति समेत बन्द गरिएको छ।
अहिले सुरक्षाकर्मी, दमकल र ५०० भन्दा बढी आपत्कालीन टोलीहरू रातभर भग्नावशेषमा पुरिएकाहरूको खोजी र उद्धारमा खटिएका छन्। संयुक्त राज्य अमेरिका, ब्राजिल, मेक्सिको, इक्वेडर र एल साल्भाडोर लगायतका देशहरूले तत्काल मानवीय सहायता र विशेष उद्धार टोली पठाउने घोषणा गरेका छन्। सुरुवातमा पुएर्टो रिको र भर्जिन टापु क्षेत्रमा सुनामीको चेतावनी दिइए पनि पछि त्यसलाई खारेज गरिएको थियो।
