झापा / झापाको झापा गाउँपालिकामा टिफरको ठक्करबाट एक जना वृद्धको मृत्यु भएको छ । दुर्घटनापछि आक्रोशित बनेका स्थानीय बासिन्दाले टिफरमा तोडफोड समेत गरेका छन् ।इलाका प्रहरी कार्यालय कुमरखोदका अनुसार आज (शुक्रबार) बेलुका अन्दाजी ५:२० बजेको समयमा झापा गाउँपालिका वडा नम्बर ४ को कार्यलय अगाडि हुलाकी राजमार्गमा दुर्घटना भएको हो ।
बालुवा बोकेर गुडिरहेको ना ५ ख ६४९० नम्बरको टिफरले बाटो काट्दै गरेका साइकल यात्री स्थानीय झापा गाउँपालिका वडा नम्बर ३ बस्ने ६५ वर्षीय इशन लाल गणेशलाई ठक्कर दिएको थियो ।टिफरको ठक्करबाट गम्भीर घाइते भएका गणेशलाई तत्काल उपचारका लागि बिएण्डसी अस्पताल बिर्तामोड पठाइएको थियो ।
अस्पताल पुर्याउँदा गम्भीर अवस्थामा रहेका र बोल्न नसक्ने स्थितिमा रहेका उनलाई बेलुका ६:२० बजे चिकित्सकले मृत घोषणा गरेका हुन् ।दुर्घटना लगत्तै बेलुका ६:३० बजे आक्रोशित बनेका स्थानीय बासिन्दाले दुर्घटनास्थलमा रहेको टिफरमा ढुङ्गामुढा प्रहार गरेका छन् । ढुङ्गा प्रहारबाट टिफरको अगाडिको सिसा फुट्नुका साथै क्षति पुगेको प्रहरीले जनाएको छ ।प्रहरीले टिफर चालक झापा गाउँपालिका वडा नम्बर ३ कामटोली बस्ने ३६ वर्षीय फागुलाल राजवंशीलाई नियन्त्रणमा लिएको छ । दुर्घटनामा परेको साइकल र टिफर तत्काल घटनास्थलमै रहेका छन् भने क्षति पुगेको टिफरलाई सुरक्षित स्थानतर्फ लैजाने पहल भइरहेको प्रहरीले जनाएको छ । घटनाबारे थप अनुसन्धान भइरहेको छ ।
