झापाको मेचीनगर नगरपालिका–१३ चारआली चौकस्थित ट्राफिक पोष्ट अगाडि भ्याट छली गरेर ल्याइएको भुईकटरसहित बोलेरो पिकअप गाडी बरामद गरिएको छ।
२०७२ साउन ४ गते राति ९:३० बजे इलाका प्रहरी कार्यालय धुलाबारी र प्रहरी चौकी चारआलीबाट खटिएको संयुक्त प्रहरी टोलीले WB73E5775 नम्बरको भारतीय बोलेरो पिकअप सवारीसाधनलाई बेबारिसे अवस्थामा फेला पारेको हो।
सवारी चेकजाँचको क्रममा उक्त गाडीको पछाडिको डालामा लुकाईछिपाई राखिएको २,४०० के.जि. तौल बराबरको भुईकटर बरामद गरिएको छ। प्रहरीले सो गाडीमा राखिएको समानको आवश्यक कागजात माग्दा नपाईएको र भारतीय नम्बर प्लेटको गाडी प्रयोग गरी मापदण्ड विपरीत भ्याट छली गरेर सामान ओसारपसार गरिएको प्रारम्भिक अनुसन्धानबाट खुलेको जनाएको छ।
बरामद गरिएको बोलेरो पिकअपको अनुमानित मूल्य रु. १५,००,००० (पन्ध्र लाख रुपैयाँ) रहेको छ भने गाडीमा लोड गरिएको भुईकटरको मूल्य रु. १,२७,५८४ (एक लाख सत्ताई हजार दुई सय चौरासी) बराबर रहेको छ। यसरी, गाडीसहित जम्मा रु. १६,२७,५८४ मूल्य बराबरको भ्याट छली गरिएको सामग्री बरामद गरिएको हो।
उक्त घटनाबारे स्थानियबासीको रोहवरमा आवश्यक प्रक्रिया पुर्याई सामान र गाडीसहित आन्तरिक राजस्व कार्यालय, ईटहरी, सुनसरीमा बुझाइएको प्रहरीले जनाएको छ।
