साङ्केतिक तस्वीर
झापा । श्रीमतीलाई कुटपिट गरी हत्या गरेको आरोपमा झापा दमक नगरपालिका- ७ का ३४ वर्षीय विनोद राई पक्राउ परेका छन् । इलाका प्रहरी कार्यालय दमकका अनुसार इलामको माङसेवुङ घर भई हाल दमक –७ सृजना टोलस्थित काजीमान श्रेष्ठको घरमा भाडामा बस्दै आएका राईले आफ्नी २८ बर्षिया श्रीमती ममिला राईलाई कुटपिट गरी हत्या गरेकाे जिल्ला प्रहरी कार्यालय झापाले जनाएकाे छ ।
छिमेकीको घरमा जन्मदिनको भोज खाएर गएराति १ बजेतिर घर आएपछि राई दम्पतीबिच झगडा भएको थियो । झगडाका क्रममा विनोदले श्रीमतीमाथि निर्घात कुटपिट गरेको इप्रका दमकका डिएसपी मनोजकुमार लामाले बताए ।
कुटपिटबाट मृत्यु भएपछि आज बिहान ७.३० बजे स्थानीयले प्रहरीलाई खबर गरेका थिए । लगत्तै प्रहरीको टोली पुगेर राईलाई नियन्त्रणमा लिई घटनाबारे थप अनुसन्धान सुरु गरिएको उनले जानकारी दिए । मृतकको अनुहार,टाउकोमा चोट लागेको देखिएको र प्रहरीले शवको मुचुल्का उठाई पोस्टमार्टमका लागि दमक अस्पताल पठाइएको डिएसपी लामाले बताए ।
