झापा । भद्रपुरमा धारिलो हतियार प्रहार गरी एक बृद्धाको हत्या गरिएको छ । साबिक पृथ्वीनगर हाल भद्रपुर २ डिगाउँकी ७० गौरीमाया तामाङ्को हत्या गरेको जिल्ला प्रहरी कार्यालय झापाले जनाएको छ ।
प्रहरीले दिएको विवरण अनुसार सोही स्थानका अन्दाजी ४० बर्षीय राजेश तामाङले शुक्रबार अपरान्ह् साढे ३ बजे गौरीमायको घरमा नै गएर धारिलो हतियार(सिक्कल)ले घाँटीको दाहिने भागमा प्रहार गर्दा उनको घर नजिकै बाटोमा मृत्यु भएको जिल्लाका डिएसपी कृष्णकुमार चन्दले जानकारी दिए ।
वृद्धा गौरीमाया राजेशकै घरमा उनको दिदीसँग गफगाफ गरी बसिरहेका थिए । सोही बेला राजेशले उनीमाथि एक्कासि सिक्कल प्रहार गरेको स्थानीयले बताएको प्रहरीले जनाएको छ । घटनाको कारण नखुलेपनि राजेशको मानसिक अवस्था ठिक नभएको स्थानीयको भनाई छ ।
घटनापछि लुकिछिपी रहेको अवस्थामा आरापीलाइ नियन्त्रणमा लिएको चन्दले जनाए ।
