झापा। सामाजिक सद्भाव र पारिवारिक एकता कायम राख्न भन्दै सोमबार मन्त्रिपरिषदले टिकटक नेपालमा प्रतिबन्ध लगाउने निर्णय गरेको छ । नेपालले गरेको यो निर्णयसँगै टिकटकमाथि प्रतिबन्ध लगाउने देशको सूची बढ्दै गएको छ ।
नेपाल लगायत अफगानिस्तान, अस्ट्रेलिया, बेल्जियम, क्यानडा, डेनमार्क, युरोपियन युनियन, फ्रान्स, भारत, लाटभिया, नेदरल्याण्ड, न्यूजिल्याण्ड, नर्वे, पाकिस्तान, ताइवान, अमेरिका र संयुक्त अधिराज्यले टिकटकको प्रयोगमाथि आंशिक वा पूर्ण रूपमा प्रतिबन्ध लगाएका छन् ।
अफगानिस्तानको तालिबान सरकारले आफ्ना जनतालाई ‘भ्रममा पर्न’बाट जोगाउन सन् २०२२ मा टिकटकमाथि प्रतिबन्ध लगाएको थियो ।
अस्ट्रेलियाको सरकारले देशको गुप्तचर र सुरक्षा निकायबाट सल्लाह लिएर टिकटकलाई प्रतिबन्ध लगाउने निर्णय गरेको थियो । यस्तै बेल्जियमले आफ्नो साइबरसुरक्षा, गोपनीयता र मिथ्या सूचनाको चिन्ताका कारण सरकारी फोनमा टिकटकलाई प्रतिबन्ध लगाएको हो ।
अमेरिका, ईयूपछि बेल्जियमले सरकारी फोनबाट टिकटकमाथि प्रतिबन्ध लगाएको थियो । भारतले पनि गोपनियता र सुरक्षाका कारण देखाउँदै टिकटक र विच्याटलगायत दर्जनौं चिनियाँ एपहरूमाथि राष्ट्रव्यापी प्रतिबन्ध लगाएको थियो । यस्तै अरू देशले पनि गलत सूचना, गोपनीयता र सुरक्षाको विषय देखाउँदै टिकटकमाथि आफ्ना देशभित्र प्रतिबन्ध लगाएका छन् ।
