झापा । झापाको मेचीनगर नगरपालिकाका दुई वटा मुख्य सडक निर्माणका लागि विश्व बैंकले एक अर्ब ३ करोड रकम सहयोग गरेको छ । मेचीनगरको वडा नंं ९ र १० जोड्ने धुलाबारी मोडदेखि धुलाबारी बजार हुँदै थोप्लेबिरान सामुदायिक वन समूहको कार्यालयसम्मको ५ दशमलव ३ किलोमिटर र मेचीनगर ६ को काकरभिट्टास्थीत भट्टराई चौकदेखि मेचीनगर ४ को बाहुनडाँगी बजारसम्मको ८ दशमलव ५ किलोमिटर बाटो निर्माणका लागि विश्व बैंकले ७८ लाख अमेरिकी डलर अर्थात नेपाली रुपैया एक अर्ब ३ करोड सहयोग उपलब्ध गराउने झापा क्षेत्र नं. १ का प्रतिननिधिसभा सदस्य विश्वप्रकाश शर्माले बताए ।
सांसद शर्माले दिएको जानकारी अनुसार ७ प्रदेशका ३३ स्थानीय तहलाई शासकीय सुधार तथा पुर्वाधार आयोजनाका लागि एक अर्ब ५० करोड अमेरिकी डलर अर्थात करीब २ खर्ब नेपाली रुपैयाँ सहयोग उपलब्ध गराउने मध्ये मेचीनगर नगरपालिका क्षेत्रका दुई वटा सडक निर्माणका लागि ७८ लाख अमेरिकी डलर बिनियोजन भएको हो ।
धुलाबारी मोडदेखि बजारहुँदै खुट्टिडाँगी भएर थोप्लेबिरान सामुदायिक बन समूहको कार्यालयसम्म जोड्ने सडकको चौडाई १२ मिटर चौडाईको बाटो हुने र उक्त सडक ड्रेन सहित दुई लेनको हुनेछ भने काँकरभिट्टादेखि बाहुनडाँगी बजारसम्मको बाटोको चौडाई ११ मिटरको हुनेछ । उक्त सडक पनि ड्रेन सहितको दुई लेनको हुने सांसद शर्माले जानकारी दिए ।
यसै साता ठेक्का प्रक्रियामा जाने यी दुई सडक निर्माणका लागि २०८२ असार ३१ सम्मको अवधी रहने बताइएको छ । गत बजेटमा समेत सडक निर्माणका लागि १७ करोड रुपैयाँ मेचीनगरमा निकासा भएको सांसद शर्माले बताए । उनले पछिल्लो समय मेचीनगर नगरपालिकामा प्रमुख प्रशासकीय अधिकृत र नगरप्रमुख बिच भएको विवादले विकास निर्माणको प्रक्रियामा असर नपर्ने विश्वास समेत लिएको बताए ।
