झापा / नेपाल सरकारका गृहमन्त्री सुदन गुरुङले झापा जिल्लाका विभिन्न रणनीतिक, संवेदनशील तथा प्रशासनिक निकायहरूको आकस्मिक स्थलगत अनुगमन गरेका छन्।
सीमा सुरक्षा व्यवस्था, भन्सार प्रशासन, सर्वसाधारणको सुरक्षा र जिल्लाको समसामयिक वस्तुस्थितिबारे प्रत्यक्ष जानकारी लिन झापा आइपुगेका गृहमन्त्री गुरुङले जिल्ला प्रशासन कार्यालयमा नागरिकता र राष्ट्रिय परिचयपत्र लिने प्रक्रियाको प्रत्यक्ष वस्तुस्थिति बुझ्न आफैं सेवाग्राही बनेर कामकारवाहीको अनुगमन गरेका थिए। सो क्रममा प्रशासन कार्यालयको सेवा प्रवाहप्रति असन्तुष्टि जनाउँदै उनले चित्त नबुझेको र सरकारी ढिलासुस्तीका कारण सर्वसाधारण सेवाग्राहीले निकै दुःख पाउने गरेको निष्कर्ष सुनाए। प्रशासनको यथार्थ अवस्था जाँच्न गृहमन्त्री गुरुङले आजै नागरिकता लिएका सेवाग्राहीहरूलाई आफैंले प्रत्यक्ष फोन गरेर उनीहरूले भोगेका समस्या, लागेको समय र वास्तविक अनुभवका बारेमा सोधपुछ समेत गरेका थिए।
