झापा । कार्यकर्ता रिहाइको माग राख्दै मेची राजमार्गमा आवहन गरिएको
यातायात बन्द फिर्ता भएसंगै छोटो दुरीका सवारी सञ्चालनमा आएको छ ।
कोशी नामकरणविरुद्ध आन्दोलन गरिरहेको प्रदेश १ पुनः नामाङ्कन संयुक्त सङ्घर्ष समितिले आह्वान गरेको यातायात बन्द फिर्ता लिएपछि यातायात सुचारु भएको हो । दुइ दिन देखिको बन्दका कारण मेची राजमार्गमा यातायात प्रभावित भएको थियोे । पक्राउ परेका कार्यकर्ता रिहाइ हुने निश्चित भएसँगै सङ्घर्ष समितिले आज अपराह्नदेखि मेची राजमार्गमा गरेको यातायात बन्द फिर्ता लिएको हो।
प्रहरीले पक्राउ गरेका कार्यकर्ता बुलेट किराँती (आन्जेस राई) को बिनासर्त रिहाइ गर्नुपर्ने माग राखेर सङ्घर्ष समितिले हिजो र आज दुई दिन मेची राजमार्ग बन्दको आह्वान गरेको थियो। आज दिउसोँनै राई रिहा पनि भइसकेका छन् । समितिले आह्वान गरेको बन्दका कारण ताप्लेजुङसहित पाँचथर, इलाम र झापा जिल्लाअन्तर्गत मेची राजमार्गमा बुधबारदेखि यातायात ठप्प भएको थियो। यातायात ठप्प हुँदा यात्रुले यात्रा गर्न पाएका थिएनन्। आज अपराह्नपछि बन्द फिर्ता भएसँगै मेची राजमार्गमा छोटो दूरीका सवारी साधन सञ्चालन भएको छ ।
मेची राजमार्गमा ताप्लेजुङदेखि भने भोली बिहानदेखि मात्र सवारी साधन चल्ने फुङ्लिङस्थित पाथीभरा यातायात प्रालिका काउन्टर इन्चार्ज शरण लिम्बूले जानकारी दिए ।
