झापा । झापाको एक विद्यालयले उपभोग गर्दै आएको जग्गा व्यक्तिका नाममा बकस पास भएको खुलेको छ । शिवसताक्षी–११ दुधेमा रहेको राष्ट्रिय रमणीय आदर्श माध्यमिक विद्यालयले पाँच दशकभन्दा बढी समयदेखि उपभोग गर्दै आएको जग्गासँगै सो जग्गामा निर्माण भएको सरकारी स्थायी संरचना समेत व्यक्तिको नाममा पास भएको खुलासा भएको हो ।
विद्यालयले २०२६ सालदेखि उपभोग गर्दै आएको उक्त जग्गा व्यक्तिको नाममा बकस पास भएको खबर सार्वजनिक भएपछि स्थानीय आश्चर्यमा परेका छन् । सो जग्गामा विद्यालयको भवन र साबिकको स्रोत केन्द्र भवन पनि पर्दछ ।२०८० साल माघ २८ गते सोही क्षेत्रभित्र पर्ने साबिकको कित्ता नम्बर १७१०१ हालको कित्ता नम्बर १९३४७ को १ कट्ठा ८ धुर ३ पाउ जग्गा मालपोत कार्यालय दमकमा विमला कडरिया थापाको नाममा पास भएको थाहा भएपछि विवाद सतहमा आएको हो ।
स्थानीयबासीका अनुसार उक्त जग्गा पूर्वपश्चिम राजमार्गसँगै जोडिएको अत्यन्तै महत्त्वपूर्ण क्षेत्रमा पर्छ । उनीहरूको भनाइमा एक धुर जग्गाको मूल्य १० लाख रुपैयाँसम्म पुगेको छ ।सो हिसाबले हाल बकस पास भएको १ कट्ठा ८ धुर जग्गाको बजार मूल्य करिब २ करोड ८० लाख रुपैयाँ बराबर रहेको अनुमान छ ।जग्गाका पूर्वधनी लगनबहादुर कडरियाले आफ्नी श्रीमती र दुई छोराको जानकारीबिना एकल निर्णयमा छोरी विमलाको नाममा बकस पास गराएको उल्लेख छ ।
जग्गा पास गर्न वडा कार्यालयबाट सार्वजनिक बाटो र घरको सिफारिस समेत लिइएको छ । वडा अध्यक्ष बहादुर आङ्बोले हस्ताक्षर गरेका छन् ।
उक्त विषयमा अख्तियार दुरुपयोग अनुसन्धान आयोग इटहरीमा उजुरी दिइसकिएको उजुरीकर्ताले बताएका छन् । उजुरीमा संलग्न सबै पक्षहरू कडरियापुत्री विमला थापा, सिफारिस लिने नाम नखुलेका व्यक्ति, वडा अध्यक्ष आङ्बो र सो विषयसँग जोडिएका कागजात, सिफारिस विवरण, विद्यालय क्षेत्रको नक्सा र तस्बिरहरू झिकाई अनुसन्धान गरी दोषी देखिए प्रचलित कानुनअनुसार कारबाही गर्न माग गरिएको आयोगमा निवेदन प्राप्त भएको स्रोतले जनाएको छ ।
विद्यालयको स्थायी संरचना निर्माण भएको जग्गा व्यक्तिको नाममा बकस पास भएको जानकारी साताअघि मात्र प्राप्त भएको विद्यालयका प्रधानाध्यापक गिरिराज शेर्माले बताए ।
उनले प्राविधिक पक्ष केलाउन थालिएको बताएका छन् । लगनबहादुरका ज्वाइँ महेन्द्र थापाले आफू कागजी र कानुनी हिसाबले दह्रो रहेको बताए ।
